Kum 2023 chhung khan Environment Forest & Climate Change department chuan sawrkar department dang, NGO leh a dangte hnenah thing tiak phun tur 126722 a semchhuak.
State Level Sub Committee on Green Mizoram 2024 chu an co-chairman EF&CC commisioner & secretary H Lalengmawia kaihhruaiin Ningani khan an thukhawm a. Heta report danin, nikum khan Green Mizoram Day ah thing tiak 29839 phun a ni a; Green Mizoram Day denchhena department hrang hrang hnenah leh NGO adt. hnenah thing tiak semchhuah hrim hrim chu a vaiin 126722 a ni.
Thutkhawma thurel zingah, Green Mizoram Day 2024 thupui atan “I nunna atan thing phun rawh” (Plant trees for your life) tih thlan a ni a. State leh district level-a kangmei veng tha district leh khua chu kum danga tih thin angin lawmman pek tura ruahman a ni.
A hmanna pui ber, state level-a hmanna atan Zokhawsang Assam Rifle’s Complex thlan a ni a. Ramngaw humhalh kawnga thawk tha bik mi pathum hnenah chawimawina – sumfai Rs. 10000 theuh leh thuziak pek tum a ni.
Hemi ni hian sawrkar department leh zirna in hrang hrangten hmun rem an neih chuan thing tiak phun se, tiin an rel bawk.
EF&CC department-in a ruahman thin angin kuminah pawh thing tiak mamawhte tan a tul angin a ruahman anga, he Ni denchhena thing tiak la zawng zawngin an thing phun an enkawl zui ngei ang, tih intiamkamna nen thing tiak pekchhuah a ni ang.
Thing tiak phun tur 126722 department-in a semchhuak
