Daily Newspaper

Thingdawlah plastic sawngbawlna khawl bun

24

Public Health Engineering Kolasib WATSAN Division hnuaia sak Plastic (Waste) Resource Management Centre, Thingdawl chu Kolaib district bawrhsap Dr H. Lalthlangliana’n Zirtawpni khan hawng.

Bawrhsap chuan plastic chu thil tangkai tak ni si, hman zawh hnua sawngbawl that loh chuan thil hnawksak ber ang hiala chhal theih ni bawk si a ni, tiin, hetianga mumal taka sawngbawl theihna tur hmun – Plastic (Waste) Resource Management Centre (PRMC) Thingdawla bun a ni chu lawmawm a tih thu a sawi. Plastic bawlhhlawh titlem tura mitin zawm ngei ngaite sawiin, “Plastic atanga siam thil hman tlem, hman nawn theih theih hman nawm zel leh thildang tangkai siam chhuah nana sawngbawlte a ni a. Thil tangkaia siam chhuah leh nan hmanraw pawimawh tak chu PRMC hi a ni,” a ti.

Plastic-in khawvel leilung leh tuifinriata nungchate thlengin a nghawng nasat hle tih Dr H. Lalthlangliana hian a sawi a. Uluk taka plastic hi sawngbawl a nih theih nan sawrkar laipui pawhin kum 2016-a Solid Waste Management Act-a duanah khan bawlhhlawh dang zinga plastic thliarhran dan tur a tel tih a sawi. Mizoramah pawh kum 2019 atang khan hetiang zulzuia dan siam a nih thu leh he dan hnuaiah hian plastic micron 50 aia pan hman phal a nih loh thu a sawi bawk.

PHE senior EE H Lalsiamliana chuan plastic hnawmhnawk leh plastic um-te chu sawngbawl hautak tak, halral dawn pawha boruak thianghlim lo siamtu a nih avangin hman nawn leh tura a sawngbawlna hmuna thawn a tul a. Awmze nei taka Plastic (Waste) Resource Management Centre-a baling machine-a nemmuk a nih hian sawt lehzualin a sawngbawlna tur hmunah a thawn thlak zung zung theih dawn tih a sawi a ni.

PRMC Thingdawl hi SBM (G) hnuaia cheng nuai 16 hmanga sak niin, plastic baling machine leh baling machine bunna tur RCC building-te a awm a. Nikum September 20-a sak tan niin kumin March 17 khan sak zawh a ni. Plastic nemmukna khawl, plastic baling machine hi kumin July 17 khan hlawhtling taka enchhin a ni bawk.

PRMC-a plastic baling machine hian plastic um lakkhawmte chu tonne 30-a ritin a nawrtawm thei a, bale khatah plastic bottle 600 atanga 650 vel zel awmin darkar khatah bale 6 vel tih theih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy