Thingtlang loneih leh ramngaw

Hmasawnna kan duh a, kan duh mai ni lovin kan mamawh a. Hmasawnna nei tur chuan power leh kawngpui tha a lo ngai a. Power-a intodelh tur chuan hydel project siam a ngai a, tuikhuahin ram zau tak tak a chimpil a, chu chuan kawng hrang hrangin mihring tan harsatna leh tawrhna a thlen a.
Kawngpui tha hi kan mamawh em em a, kawngpui tha nei tur chuan ramngaw zau tak tak thiah a ngai a. Ramngaw thiah avangin sik leh sa a lo danglam phah a, tuihna a lo kang a, nungcha hrang hrang nunphung a khaihlak a, chu chuan mihringte khawsak phung leh eizawnna thlengin a nghawng thei a.
Hmasawnna thil dang heng zirna leh hriselna bakah sports lama hmasawnna nei tur pawhin building construction/infrastructure din avangin ram zau tak tak thiah a ngai a, kan mamawh miau avangin kan thiat lo thei si lo. Heng hmasawnnate hi mihring kan nih chhung chuan kan mamawh em em a ni vek si a, hetiang hi nei tur chuan ramngaw, thing leh mau, ram hring thiah a lo ngai ta thin a.
Hetih lai hian, ei leh bara kan rin pui ber buh chinna turin thingtlang loneih (shifting cultivation), ramngaw râl (enemy of forest) tih hial theih chu tun thleng hian kan la bansan thei hauh bawk si lo a. He shifting cultivation hian ramngaw a heh ber a tih theih ang.
Hmasawnna hrang hrang neih duh avanga ramngaw thiah a ngaih pawhin, ramngaw dang din lehna tura hmalatu tur Compensatory Afforestation Fund Management and Planning Authority (CAMPA) a awm a. Hmasawnna hnathawktu Agency ten, ramngaw an tihchhiat ang hu, hmun danga ramngaw din lehna tur atan pawisa an thawh thin a, chu chu Compensatory Afforestation Fund tih niin, rambua-ah thing phun lehin ramngaw thar siam lehna tur a ni. Hmasawnna hnain ramngaw a tihchhiat hlutzawng ang hmun danga din leh zel a nih avangin a la ziaawm viau.
Hetih lai hian, thingtlang loneihnaa ramngaw tihchhiat hi chu kalsan tawp mai a ni thin a, chu chuan ramngaw a heh em em mai a. Kan buh tharchhuahte lah hian kum tina ration buhfai kan lei thin hi a chhawk zangkhai der bawk si lova, thingtlang loneih hi chu ral beiha beih a ngai tawh ni berin a lang.