Third round lut zingah Swiatek

Third round lut zingah Swiatek
Champion tura rinkai langsar zinga mi top seed Iga Swiatek chuan minute 65 lek chhungin Japanese qualifier Ena Shibahara lakah 6-0 6-1 hnehna nuamsa a chang a, US Open women’s singles third round lamah Russian Anastasia Pavlyuchenkova a hmachhawn dawn a ni.
Kum 23-a upa Swiatek hian Thawhlehni daih tawh khan a first round match-ah rim taka thawkin lucky loser Kamilla Rakhimova chu 6-4 7-6 (8-6)-in a hneh hram a; kha match-ah khan unforced error tum 41 zet a nei a, Ningani zan second round match-ah erawh Shibahara lakah tihsual a nei tlem ta a, unforced error pawh vawiruk chauh neiin, a nihna dik tak a pholang leh tan.
World number one hian New York-ah 2022 title a lo hlawhchhuak ve tawh a, third round lama a tum leh tur Pavlyuchenkova hian set khatna hloh zet chungin Elisabetta Cocciaretto of Italy lakah 5-7 6-1 6-2 comeback hnehna a chang ve bawk.
Ningani second round inkhel dangah Russian 21st seed Mirra Andreeva chu world ranking-a 59-na daih American Ashlyn Kreuger lakah 6-1 6-4-in a tlawm!
American sixth seed Jessica Pegula thung chuan 7-6 (7-4) 6-3-in first round-a 2021 champion Emma Raducanu hnawtchhuaktu a chipui Sofia Kenin a paltlang thung.
Wimbledon champion hlui leh fourth seed ni bawk Elena Rybakina erawh second round match danga France player Jessika Ponchet hmachhawn tur a nih laiin hliamin a tibuai a, world number 143 Ponchet chu walkover-in a tlang phah daih.
Italian fifth seed Jasmine Paolini pawh game khatna leka hliam avanga 2016 runner-up Karolina Pliskova inhnuhdawh avangin third round lut zingah a tel.
Czech Pliskova hian a kephah na avangin medical treatment a la a, chumi hnuah pawh a khelh chhunzawm theih tak loh avangin Louis Armstrong Stadium chu lunghnur takin a chhuahsan.
Kumin French Open leh Wimbledon finalist Paolini hian third round-ah Kazakhstan player Yulia Putintseva a tum leh ang.
Flushing Meadows, New York-a US Open women’s singles second round match dangah Czech Republic nula Karolina Muchova chuan he hmuna vawihnih champion tawh Naomi Osaka chu 6-3, 7-6(5)-in a hneh ve bawk.
Muchova hi nikum khan a career-a season tha ber a hman mek laiin banrek hliamin a tlakbuak a, thla 10 zet a chawlh hnuah Ningani zan khan Arthur Ashe Stadium-ah pui takin a inlan chhunzawm leh thei a, third round lamah unseeded Russian Anastasia Potapova a su zui leh dawn a ni.
Nilaini result la tarlan lohah Coco Gauff, Aryna Sabalenka, Victoria Azarenka leh Qinwen Zheng-te’n US Open women’s singles second round match-ah hnehna an chang a, an third round inkhel result erawh tarlan hman a ni lo.
United States innghahna lian leh defending champion ni bawk Gauff hian unseeded German Tatjana Maria lakah 6-4, 6-0 hnehna changin, 2019 semi-finalist Elina Svitolina of Ukraine lakah fiahna hautak zawk tura ngaih a hmachhawn zui leh.
Belarusian second-seeded Aryna Sabalenka pawhin Italian world number 76 Lucia Bronzetti chu 6-3, 6-1-in a sawp. Belarus innghahna dang 20th seed Victoria Azarenka pawhin France nula Clara Burel laka 6-1, 6-4 hnehna changin US Open women’s singles second round a paltlang a, world number one hlui leh Australian Open champion tum hnih ngawt ni tawh hian Chinese Wang Yafan a tum zui leh.
Olympic champion leh Chinese number one ni bawk Zheng Qinwen chuan second round match dangah hnehna chang thungin, Russian Erika Andreeva lakah 6-7(3), 6-1, 6-2 hnehna a sualchhuak a, kumin Australian Open runner-up Zheng hian third round lamah Germany player Jule Niemeier a hmachhawn.
US Open finalist pawh lo ni ve tawh Madison Keys of the United States chuan Arthur Ashe Stadium-ah Australia 14th seed Maya Joint chu Nilaini vek khan 6-4, 6-0-in a sawp.
US Open main-draw lama tum 13 inlan tling tawh kum 29 mi American Keys hian 2017 US Open final-ah khan a chipui Sloane Stephens a ngam lo a, kumina fina; a beisei lehna kawngah 33rd-seeded Belgian Elise Mertens hneha third round a luh leh luh loh tarlan hman a ni lo.