Daily Newspaper

THIS TOO SHALL PASS

14

– raizawka
Camp : ZTN

Tum khat chu lal ropui Solomona khan a khâwnbawl upa pakhat Benaiah ben Yehoyada an tih hnenah chuan, zungbun thiltithei, a lungngaih nia tihlim thei tûr leh a hlim ni pawha tilungngai nghal thei tûr khawpa dangdâi leh mak chu a hnêna lâksak tûrin a ngen a. Benaiah ben Yehoyada chuan bangbo angreng tak leh a ngaihna hre lo tak chungin lalber zungbun duh chu a zawng ta a. Nakinah chuan sumdawng pakhat hnênah chuan kalin, lalin a zungbun duh ang chu a neih leh neih loh a zâwt a. Chu sumdawng chuan awlsam tê hian a neih thu chu a lo sawi ve mai bawk a. Tichuan, zungbun pakhat chu a leisak ta a. A lei dawn chuan chu sumdawng chuan zungbunah chuan eng emaw hi a ziak a, Benaiah chu a pe a. Tichuan, chu zungbun keng chuan Benaiah chu Solomona hnên lam pan chuan a kal ta vang vang a, Solomona chuan Benaiah hmel a hmuh chuan a zungbun duh ang chu a hmuhsak thei ta em tih a lo zâwt nghâl var a. Benaiah chuan a hmuh thu hrilh pah chuan a zungbun lei chu lal hnênah chuan a han pe a. Chu zungbun Solomona’n a hmuh chuan mak a tiin, a mengphâwk nasa hle. Benaiah-a’n a lei dawna sumdawngpain zungbuna thil a ziah khân he thu hi a lo ziak a lo ni a : ‘This too shall pass’ (Hei ngêi pawh hi a la ral ang / Gam Zeh Ya’avor), tih hi. Lal chuan a awmzia a han zâwt a, a khâwnbawl upa chuan heti hian a chhang a, ‘A lungngaihnate chu hunin a la liampui anga, a hlim nite pawh chu hunin a la liampui tho tho dawn a ni,’ tiin. Chu thu tawi tê, awmze thûk leh ril tak ni si chu vawiin thleng hian mi tam tak chuan lungngaihna kawr rûam thûk an zawh lâia inhnemna thu hlu atân an la hmang ta zêl a ni.

Chung lama chawlhna daihlim hnuaia kan chawlh hun a thlen hmâ loh zawng, he raltitna hmun, khâm leh sûar nasa kârah hian hahdamna zawngin kan hmanhlel a. ‘Kei hi eng ka ti nge, chawl thei loa ka awm’ tia rûm kâwk kâwk chunga mi thianghlim kal hmasate ngaia kan awh ni a va tam thin em. Bianga thlan tui luang zawih zawiha kawla ni chhuak chhiara ni tla vân vuaia thawkrim chunga eikhawp hmu tâwk tâwkte tân hian, chawlhna daihlim hnuaia lungmuang lungdama hauhuk kah thlâk an sawi ang maia zangthal meuha mut hahdam veng veng a va chakawm thin em! Mahse, engtikah emaw chuan, he’ng kan thawhrimna leh hrehawmnate hi an la kîang ve ang a, zalênna kawng harsa leh khawkrawk zawng zawngte hi kan pal chhuah hunah chuan, zalênna tlang thengthaw nuam takah dingin thihna kawr rûam chu kan chhuk thlir tawh ang a, kan hrehawmna leh awt chunga kan awh ngam lohna khawvel hrehawm chu hunin a la liampui ang a, retheihna avanga kan tahna mittui pawh hulin a la hil ang. A ni, hei ngei pawh hi a la ral vek ang!

Tunah hian inhrilh leh chuan pawh ngai loin khawvel chuan harsatna thuhmun pakhat kan tawng mek. Mi za tamin nunna an chân tawh a, sang tam tak tân tahna leh lungngaihna bang sang tak chu a intîang mek a nih hi! Ram hausa leh ram rethei a thliar loa, mi hausa leh mi rethei a hmaih hek lo. Kan lehkhabu thianghlimin, ‘Mi hausa leh mi rethei an chêng zâa, an vâia siamtu chu Lalpa a ni,’ a tih ang deuh khan, mi hausa leh mi rethei kan chêng zâa, kan vâia kan tawrh chu hripui lêng a ni. Khawvel a mangang a, thlaphânna leh mangannain hringnun a tuam mek a nih hi.

He kan ram ngeiah pawh hian buaiin kan phili a, hlauhna leh khurhnain min man a, inhnêm tur pawh kan awm chuang lo emaw tih tur khawpin kan ralti zo titih ta. Khua leh veng tin a buai zo a, himna zawngin kan thiam ang angin kan inbuatsaih a, hnehna tûmkau chawi ngei tumin kan bân kan vai mêk a nih hi. Kan vanneihna pakhat erawh chu, kan thlaphân lai taka min hnêm tura Pathian mite lo lang thin te, mi dang tanpui tûra mahni inpête thâwm hriat tûr lo awm leh thin te hi a ni. A thlamuanthlâkin fak an va phû em. Ding lawk teh u, tun hi sa seh tûr zawnga phi ruai hun a ni loa, sakawlh ang maia hriin a seh tûrte vênghim tura tan lâk hun a ni zawk e.

Hriat reng atâna duhawm loh kum kan hman mêk lai hian, mi dangte thinlunga hriat reng i nih theihna tur atâna hun tha chu a inhawng mêk zêl a, hriat rengtlâk loh kumah hian hriat rengtlâk nun hnutchhiah tum ang che.

‘Tunah doral lian chhûm ang zîng mah se,
A la kîang ang hnam tin rûmna hi;
Hnam tin lungrual dâr ang lênna tûr ni,
A herchhûak ang chung Pathian zârah.’

Ni e, kan tawrhna leh kan rûmna chu tamin zual hle mah se, hei ngei pawh hi a la ral ang.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy