Daily Newspaper

Thisen pe thate hnenah lawmthu sawina hlan

36

Kum 2019-2020 chhunga a huhoa a thlawna thisen pe thate hnenah Thawhtanni khan lawmthu sawina thilpek hlan a ni.

Association for Voluntary Blood Donor (AVBD) president C. Lalnunnema sawi danin, thisen pe thate hnena lawmthu sawi thilpek hlanna hi kum 1999-2000 atang khan kumtin buatsaih thin a ni a. Lawmman siam dan inkaihhruaina fel tak neiin, sawrkar kum (financial year) dung zuiin hemi hun chhunga thisen pethate pual hian buatsaih a ni. Aizawl district bikah chuan Civil Hospital Aizawl, Synod Hospital Durtlang leh Zoram Medical College Falkawn blood bank-a thisen pe thate a huam a, a bak chu district tina AVBD branch-ten an buaipui ve thung a ni.

April 2019 – March 2020 chhung hian thisen unit 30448 pek atanga unit 27676 ((90.90%) chu a thlawna pek a ni a. Heng zingah hian kohhran thalai pawl pek zat unit 7979 a nih laiin zirna-in ten unit 6450 an pe a, YMA branch/joint hrang hrangte pek zat unit 2558 leh, pawl dangte pek unit 3256 a ni. Pawl hming ni lo, mahnia pek (individual donation) atangin unit 7433 a awm bawk.

Hemi hun chhunga a thlawna thisen pe hnem ber chu NSS (National Service Scheme) Mizoram a ni a, NSS hnuaiah hian mipa 4006 leh hmeichhia 1670, a vaiin unit 5676 pek a ni.

He hun hmanpuitu, Mizoram Journalists’ Association president Zonunsanga Khiangte chuan damlo mamawhtute tan a thlawna thisen miin an pek theihna tura hmalatu AVBD hnathawh chu fakawm a tih thu a sawi a. Thisen pek chu taksaa harsatna leh hrisellohna avangte in a duh leh chak nazawng tana tih theih ngawt a nih loh avangin, a pe theite an nihlawhin an hlu hle tih a sawi. AVBD-in a thlawna thisen pek zaah za nih tir an tum chu a hlawhtlin theih nan kan hmazawn theuha tan tlan a ngai, tiin, thisen pe tam te rawngbawlna a ropui hle rualin, Blood Bank-a thawktute hnathawh ropui a tih thu a sawi in, a ni.

Civil Hospital Aizawl medical superintendent Dr. Lalhmuchhuaka chuan Covid-19 leng vanga total lockdown neih tirh ata, tun thlengin hun harsa tak karah pawh thisen tlachham leh phang miah lovin vawiin kan thleng hi a bikin thisen petute leh AVBD chungah lawmthu ka sawi a ni, a ti.

NHM Mission director Dr Eric Zomawia chuan kum kaltaah voluntary blood donation-ah Mizoram-in zaah 90 a chuang pha leh kumin kum kal mek quarter khatnaah zaah 94.4 a tling thei chu AVBD leh a thlawna thisen petute zar a ni, tiin, Health department hmingin lawmthu ka sawi a ni, a ti. Thisen pe tawhte zingah a tam zawk chuan an chhunzawm zui zel lem lo tih sawiin, donor-ten thisen pek chu chhunzawm zel turin an insawm tih a sawi bawk.

THE AIZAWL POST – Tualchhung

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy