Ruihhlo a hluar a, zu pawh a tam. A man lah an man hnem. Zu-ah hian a sen chi a tam a, tualchhung zu pawh a tam.
Tun hnaiah tualchhung zu a pung a, excise force te pawhin an man hnem. Aizawl leh a chhehvelah zu siamna hmun a thang a, zu hi a tam an ti.
Mizoram Excise & Narcotics (MEN) department-in kuminah October thla thleng khan tualchhung zu litre 56,207.095 an man tawh a, thla 10 chhunga an man hi a tam tham khawp mai.
MEN department hian 2020-ah khan tualchhung zu hi kum tluanin litre 46,083.762 an man a, kuminah September-ah khan hei aia tam hi an man tawh. 2021-ah litre 40,334.032 an man a, kuminah August thla thlenga an man kha litre 44,211.865 a ni.
Tualchhung zu tam tham tak an man tawh bakah zu bilh lai (fermented rice) pawh tin 1,00,821 an man tawh a, zu siam nana hman bel 2,262 leh dawidim kg 116.577 an man tawh.
MEN department hotute chuan Aizawl dai vela zu siamna hmun hrang hrang an thang tih an sawi a, a thawktu an pun bakah hmanraw lamah pawh an thang tih an sawi.
An sawi danin, Aizawl dai vela zu siamna thang hian hmun dang thenkhata zu zuarte a nghawng a, Aizawl dai vela zu siam hi hmun hla tak tak a thlen avangin hmun dang zu zawrhna hmun ni thin, tawp ta sawi tur a awm nual.
“Lawngtlai district-a zu an man pawh Aizawl daia mi a lo ni daih a, chutiang chu sawi tur a awm fo mai,” MEN department hotu pakhat chuan a ti.
Thla 10 chhungin tualchhung zu man hnem
