Taxation department chuan sawrkar kum kal mekah, July thleng khan chhiah hrang hrang cheng vaibelchhe 415.84 a hmu tawh.Mizoram Taxation department hian July thla chhung khan cheng vaibelchhe 108.75 a lakhawm a. GST-ah vaibelchhe 79.34, VAT-ah vaibelchhe 27.79 leh profession tax-ah vaibelchhe 1.61 a ni. Sawrkar kum kal mek, 2023- 2024 ah July thleng khan cheng vaibelchhe 415.84 a lakhawm tawh a ni.
Goods & Service Tax Council thutkhawm vawi 51-na chu an chairperson, Union Minister for Finance & Corporate Affairs Nirmala Sitharaman kaihhruaiin Nilaini khan inbiak hmuh theihna hmanga neih a ni a. Union Minister of State for Finance Pankaj Chaudhary, state/UT Finance /Taxation minister (council member ho) leh taxation officer-te an tel. Mizoram atang pawhin Taxation minister Lalchamliana bakah Taxation principal secretary Vanlal Chhuanga, commissioner R Zosiamliana bakah official dangte an tel. Thutkhawmah hian Mizoram-in chhiah a lakkhawm dan hi report a ni.
GST Council chuan kum thum chhung a lo ngaihtuah tawh, sum khelhna hmun (casino) atangte, sakawr intlansiak atanga sum inchawina (betting on horse racing) atangin leh online gaming atanga GST lak dan tur an sawiho a. Heng sum khelhna hrang hrangah hian GST 28% lak remtih a ni. Hemi atan hian tuna GST dan hman mek chu tih danglam (amend)a ngaih dawn avangin kumin October 1-a hman theih turin central leh state hrang hrang chu hma la nghal tura beisei an ni.
Thla 4 chhungin chhiahah cheng vbch. 415 hmu tawh
