2023 November 30-a Central Women Jail Aizawl atanga tlanchhuak mi pathum zinga pahnih chu tun ni hnih chhung khan Champhai Police-ten an man.
Champhai Police-te sawi danin, May 8 khan Chalbawia Junction Police Check gate ah Aizawl lam mi mi pali – Lallawmsanga, Mission Veng inti, Lalhruaizeli leh Laldingngheti, Zuangtui inti leh C Lianhmingthanga, Zemabawk inti chu heroin gram 250 (hawng 22) nen an man a, heng mite hian heroin hi Lalchhanmawii hnen atanga an lak niin an sawi.
Lalchhanmawii hi Myanmar atangin Mizoram lama heroin tawlhlut thin a ni tih police-te hian an hre sa tawh a, man tumin veh thin mah se, ram danga awm a nih avangin an man fuh thei thin lo a ni.
May 8-a heroin tawlha puhte hnen atang hian a phone number hria in, a awmna chin an chhui a, May 11 khan Champhaiah a awm tih hria in, an chang a, hemi tlai hian Champhai chhuahsana Khawzawl pan a tum mek lai an man a ni.
Thudawn danin, tlemin a lan dan danglam deuh tawh mah se, amah hi nikum November 30-a Central Women Jail atanga tlanchhuak ngei a ni tih a thlalak atang ringawt pawhin a hriat a, chutihlaiin a ni hi chuan jail atanga tlanchhuak Lalchanmawii a ni loa, Lalpekmawii niin police-te hnenah hian a insawi.
Champhai Police hian thu an dawn angin May 12 zan khan 2023 November 30-a Central Women Jail atanga tlanchhuak Lalruatsangi chu an man leh.Thudawn danin, Lalruatsangi hi a tlanchhuah hnu ah Myanmar lam Khawmawi khuaah a lut a, Inrinni zan khan Zokhawthar a rawn lut tih hria in police-ten an lo chang a, an man ta a ni.
2023 November 30 zing dar 1-2 inkar khan Central Women Jail atang hian hmeichhe pathum chuan an blanket leh puan suihzawmin jail bangah an bang liam a, an tlanchhuak a ni. Heng mite hi Lalchanmawii (42), Tuirial; Lalruatsangi (28), Thuampui, Niengboi (33), Churachandpur Manipur an ni a, an vai hian ruihhlo kaihhnawiha man vek an ni.
Thla 5 hnu ah jail tang tlanchhuak pahnih man
