Thla khat chhungin Punjab tui lianah mi 29 thi
Punjab-a tui lian nasa tak avanga thi chu thla khat chhungin mi 29 an tling ta a, Pathankot district-ah an tam ber a. Tui hian hian mi nuai 2.56 chuang a tibuai mek bawk niin thuneituten an sawi.
August 1 atang khan district 23 an neiha 12 chu tui lian hian a tibuai tawh a, state sorkar hian Punjab-in kum tam tak chhunga an tawrh nat ber a ni tih bulletin an chhuahah an tar lang.
Punjab-a tui len chhan ber hi Sutlej, Beas leh Ravi lui lian leh kum dang ang bawka Himachal Pradesh leh Jammu & Kashmir-a ruah sur nasa lutuk vang a ni a. An state chhungah ruah a sur nasat ve tho bawk avangin a nasa zual ta hle a ni.
Bulletin-in a tar lan dan chuan mi 29 thi an awm tawh a, Pathankot district-ah tam berin mi paruk an thi a. Amritsar, Barnala, Hoshiarpur, Ludhiana, Mansa and Rupnagar district-ah mi pathum theuh, Bathinda, Gurdaspur, Patiala, Mohali leh Sangrur-ah mi pakhat theuh an thi bawk.
Pathankot-ah hian chin hriat loh mi pathum dang an la awm bawk nia tar lan a ni.
State chhung hmun hrang hrangah tui lian avang hian mi 15,688 hmun himah sawn chhuah an ni bawk.
Gurdaspur district-ah mi 5,549, Ferozepur-ah 3,321, Fazilka-ah 2,049, Amritsar-ah 1,700, Pathankot-ah 1,139, Hoshiarpur-ah 1,052, Kapurthala-ah 515, Mansa-ah 163, Moga-ah 115, Tarn Taran-ah 60 leh Barnala-ah mi 25 hmun hima sawn chhuah an ni.
Tui lian hi khaw 1,044-in an tuar a. Gurdaspur-ah 321, Amritsar-ah 88, Barnala-ah 24, Fazilka-ah 72, Ferozepur-ah 76, Hoshiarpur-ah 94, Jalandhar-ah 55, Kapurthala-ah 115, Mansa-ah 77, Moga-ah 39, Pathankot0ah 82 leh SAS Nagar-ah khaw pakhat an ni.
Tui lian hian mi 2,56,107 tibuai mek a. Amritsar (35,000) chu a tihbuai tamna ber niin Ferozepur (24,015), Fazilka (21,562), Pathankot (15,053) Gurdaspur (14,500), Hoshiarpur (1,152), SAS Nagar (7,000), Kapurthala (5,650), Moga (800), Jalandhar (653), Mansa (163) leh Barnala (59) ten an dawt.
Bulletin-ah hian ranvulh thahnem tak hloh a ni bawk tih tar lan a ni a; mahse, a zat tak erawh hriat a la har rih a, tui a kâm hunah a hriat chian theuh deuh a beiseiawm nia tar lan a ni.
Thil chhiate pawh a kimchang chuan tui a kâm phawt loh chuan hriat vek theih a ni rih lo bawk.
District hrang hragah thlai chinna ram hectare 96,061-a zau tui hian a chim bawk.
State chhunga a thawk thei chi bakah NDRF, SDRF, army leh Punjab Police chuan chhun zan zawmin nunna hloh tur leh bungrua hloh tur veng leh chhanhim hna an thawk tih bulletin-ah hian tar lan a ni.
Pathankot, Gurdaspur, Amritsar, Ferozepur, Fazilka leh Bathinda district-ah NDRF team 20-in chhawmdawl leh chhanchhuah hna an thawk mek tih hian tar lan a ni bawk.
Tui lian avanga chhiatna leh buaina an tawh mek lai hian Prime Minister Narendra Modi-a chuan China-a SCO Summit a tel hnua a haw veleh, Thawhtanni tlai khan Punjab Chief Minister Bhagwant Mann chu a be nghal a. Harsatna an tawhah a tul ang apianga puih a inhuam thu leh an dinhmunte a sawipui.
Thawhtanni vek khan chawhmaah Union Home Minister Amit Shah-a pawhin chief minister leh governor chu an dinhmun zawtin a be bawk.
Thla khat chhungin Punjab tui lianah mi 29 thi
