Sumdawnna lama thawhpui tur an hmuh zawh ngang loh avangin Indian top flight-in harsatna namen lo a tawk a, Mizo tlangval Lallianzuala Chhangte telna player hraw zual thenkhatin Fifa puihna an ngen hial hnuah Thawhlehnia sawrkar hotu lawk leh Indian football hotu liante inhmukhawm chuan club 14 inelna tur Indian Super League (ISL) season thar tan hun atan thla thar February ni 14 hi an titlu ta rup mai!
ISL 2025-26 season tan hun tur hi sports minister Mansukh Mandaviya ngeiin a puang chhuak a; Thawhlehni vek khan ISL hmaa division sang ber ni reng thin I-League chungchang pawh sawifel nghalin, ISL tan hun velah tho hian an tan ve dawn a, team 11 an intihsiak thung ang.
Mandaviya chuan, “ISL chungchangah sawi neuh neuh leh beiseina hrang hrang tam hle mah se vawiin hian sawrkar laipui, football federation leh tournament khel tur club 14-te bakah Mohun Bagan leh East Bengal aiawh inhmukhawm chuan ISL tan hun atan thla thar ni 14 khi kan titlu thei ta a ni,” a ti.
Minister thupuan zawhah hian dem hlawh tak All India Football Federation (AIFF) President Kalyan Chaubey chuan sawifiah ngai thenkhat a sawifiah zui ve nghal bawk.
Season thar ISL hi home and away kalphung bawka khelh leh tur niin, a pumpuiah match 91 khelh a ni ang a; second div ision I-League lamah game 55 khelh a ni thung dawn a ni.
Chaubey chuan ISL season thar tan thei tura sum an thawhkhawm dan sawiin, “ISL huaihawt tura cheng vaibelchhe 25 ruahmanah 10 percent fund chu AIFF tum tur niin, 30 percent chu sumdawnna lama kan thawhpui (commercial partner) lam tum ve tur ni mah se thawhpui hi kan la nei rih lo a, AIFF lamin sumdawngte thawh ve tur ai hi kan chhungkhat rih mai dawn a ni.
“Ti chuan, commercial partner kan hmuh hma zawng chu AIFF-in ISL tan cheng vaibelchhe 14 kan thehchhuak dawn a, I-League tan vaibelchhe 3.2 vel kan pe bawk ang,” a ti.
AIFF president Chaubey hian a sawi zel danin, league pahnih buaipuitu tur Governing Council Board an din tur thu leh chu chuan league behchhana sumdawnna pawh an thunun tur thu a tarlang tel.
Thla tharah ISL!
