ZPM sawrkarin thlai thar lei tur a sawi lawkte lei kawnga hma latu tur Agriculture Market Assurance Fund Management Board leh Agriculture Market Assurance Management Committee chuan thlai thar lei a nih hma hauhin thutkhawm sensoah cheng nuai hnih chuang an seng tawh tih Congress Thalai chuan an sawi.
Congress Thalai Hqrs. thuchhuak chuan, 2023 December 8-a chief minister atana lakluh Pu Lalduhoma chuan ZPM sawrkarin ni 100 chhunga a tih tur point 12 a puang a, thlai thar leina tur vaibelchhe 110 dah a nih thu a puang tih a sawi. August 15-a Independence Day lawmnaah ni 100 chhunga tih hlawhtlin tur hi an tihlawhtling vek tih sawiin, hemi hnuaiah hian thlai thlan bikte hlawk zawka hralh a nih theih nana hma la tur Agricultural Market Assurance Fund Management Board din chu hmalakna pawimawh tak pakhat a ni a. Revised estimate 2023- 2024 angin Agricultural Market Assurance Fund atan cheng vbch. 110 dah a ni tih a sawi nawn thu a sawi bawk.
Chief minister-in ni 100 chhunga tih tur a sawi programme hnuaia project-te chu 2024 March 31 chhunga tihhlawhtlin tum thu February 27-a a sawi chu Independence Day lawmnaah tihhlawhtlin a nih thu a sawi chu mipui bumna a ni, tiin, ‘He sum, cheng vbch. 110 hian Agriculture Market Assurance Fund (thlai thar support price atana dah) atangin thlai thar engmah lei a ni loa, Agriculture Market Assurance Fund Management Board leh Agriculture Market Assurance Management Committee meeting senso atan Rs. 2,09,200, market study senso Rs. 48583 leh stationary senso atan Rs. 2600 hman a ni thung,’ a ti.
Engkim research base fel vek tawha sawrkarna siam a, ram kaihruai tura insawi siin engmah an lo inpeih loh zia a lang tih Congress Thalai hian sawiin, ‘Thlai thar pawh lei si loa meeting sensoa mipui sum heti zat an ei liam mai mai nuamtawl sawrkar kan hrawn hi a vanduaithlak a. Chief minister-in ni 100 chhunga tih tur kan ti hlawhtling a tih pawh dawt a nih zia a tarlang,’ a ti.
Thlai thar lei dan tur ngaihtuahtu Board thutkhawm senso – nuai 2 – Congress Thalai
