Loneitute’n an thlai thar an thawh khawm a, khawtlangin an thiar khawm hnuah an khaw paltlangtu khualzinte an sem a, an hlimpui hle.
Kar hmasa Nilaini, June ni 24 khan Lunglei district-a |hualthu khaw mipuiin ‘Thlai thar sem chhuah runpui’ an buatsaih a, an khaw paltlangtu khualzinte hnenah an thlai tharte an lo pe a ni. Nuam an ti a, an hlimpui, tih zel chi-ah pawh an ngai.
|hualthu hi Lunglei leh Lawngtlai inkara awm a ni a, khualzinte paltlang khua, khualzinte’n chawhmeh leh thil dang an lei thinna a ni. Thlai thar an sem pawh hian a dawng tur an thahnem ang tih a chiang a, a sem pawh an sem hnem ang.
‘Kan khaw rawn paltlang tawh phawt chu kan lo pe a, Mizo leh hnam dang, kan lo pe vek,’ an ti a, ‘Inthlahrung tak tak an lo awm a, mak an ti a, an la hreh a, kan pe lui bawk a,’ an ti bawk.
An khua hian thlai an thar tha a, an khuaa an zawrh bakah Lunglei, Hnahthial, Lawngtlai leh Siaha-ahte an zuar thin. Kumin hian loneitute zingah thlai an thar that thin avanga Pathian hnena lawmthu sawi nana sem ni se tia rawt an awm a, VC te hnena lo rawt te pawh an awm. Tichuan, VC leh an khuaa tlawmngai pawlte nena tangrualin a sem chhuah runpui chu an buatsaih ta a ni.
“Thlai hi kan thar tha thei khawp mai a, kumin hian kum dang aiin kan thar tha niin kan hria a, a bikin mai hi. Tichuan, mite tana luan chhuah tha ti, kan VC te hnena lo sawi an awm a, tichuan kan phur tlang ta khawp mai a, khawtlang huapin kan ti ta a ni,” tiin |hualthu-a loneitu pakhat Pu Sangzuala chuan he thil lo irh chhuah dan a sawi.
“Kan hlim khawp mai. Hlim takin kan sem a, a hnuah pawh hei, kan la hlimpui. Tih fo chi a nih hi mawle kan ti hlawm,” a ti bawk.
Hna an thawh dan hi, zing dar 3 velah lo lam panin an chhuak tawh a, khaw en tirh atangin thlai an la tan thin. Zing lam dar 8 dar 9 velah chuan motor kal theihna hmunah an chhek hman tawh. Chu chu chhun lamah an zuar ta thin a ni. Tun tuma an sem hian, an khuaa lirthei neite’n a thiar nan an lirtheite an thawh a, an semna hmun an phurh thlenin mai te, fanghma, te sil theih chi chu hnatlangin an sil leh. A khawtlang huapin an che tawp mai a ni.
Khualzin motor an lo thlenin an lo tiding a, an thlai tharte chu an lo pe thin. Inthlahrun vanga la hreh te pawh an awm a, an pe lui tho. Khualzin zawng zawng pek vek an tum tawp mai a ni.
Mai, fanghma, vaimim, berul, changkha, antam, lakhuihthei, mautuai leh rawtuai, phuihnam, tawkte, thlai chi hrang hrang an chhawp a, a tam ber chu maite a ni ang a, fanghmain a dawt ang an ti.
Maite hi an chhut theih chinah tawn 1500 vel an sem a, tawng khatah hian a lian chu panga vel zel, a lian lo deuh chu pasarih-pariat veltein an tawn.
“Nuam kan ti a, a khawtlangin kan hlimpui a. A hnu zelah pawh kan hlimpui. A khaw mipui kan tangrual tak tak a, mahni tih theih tawk chu kan ti vek a ni,” an khaw pa pakhat Pu Lalneihkima chuan a ti.
|hualthu hi in 150 vel an ni a, in 100 chuang, in 120 vel chuan lo an nei ang. Loneih hi an hna ber a ni a, an thlai thar an khuaa an zawrh hi zan riak lo se an duh a, an hralh zawh hman loh chu a leitute hnenah zan riak a nih thu an hrilh thin. An khuaah chauh ni lovin hmun hrang hrangah an thawn darh a, an eizawnna ber a ni.
Thlai thar sem chhuah runpui hlimpui
