International Fund for Agricultural Development (IFAD) bultum Fostering Climate Resilient Upland Farming Systems in the North East (FOCUS), Mizoram kaltlanga buatsaih, thlai thartu leh leitute indawrtawnna ‘IFAD-FOCUS Mizoram Buyer Seller Meet 2024’ ni hnih awh tur chu Zirtawpni khan Millennium Centre Exhibition Hall Rooftop-ah neih tan a ni.
Buyer Seller Meet-ah hian FOCUS Project hnuaia district hrang hrang 6 atanga farmers interest group leh entrepreneur, society leh farmers producer organisation thlanchhuahten stall 40 chuangah an thlai thar leh eitur sawngbawl sate phochhuakin an zuar a. State chhung leh pawn atanga eitur zuar thin leh sawngbawla zuarchhuak thin mi engemawzat telin, district hrang hrang atanga thlai thartute leh eitur sawngbawl thinte nen insumdawn tawnna tha zawk neih a nih theih nan an indawr tawn a ni.
Meet hawngtu Agriculture and Farmers Welfare minister PC Vanlalruata chuan ram sum dinhmun siamthat nana pawimawh ber leh mipui tam zawk eizawnna agriculture sector chawikan kawngah kan zavaia tanrual a ngai tih sawiin, “Hei hi kan puitlin theih phawt chuan kan ramah agriculture-in nasa takin hma a sawn thei dawn a ni,” a ti.
Kuthnathawktute dinhmun leh harsatna an tawhte hriat tlan a pawimawh, tiin, anmahni atangin thar chhuah awm ringawt mah se, a hralhna market lamin a umzui si loh chuan hmasawnna tluantling a awm thei lo tih minister hian a sawi. “Market-in hma a hruai loh chuan harsatna tam tak kan tawk thei a, kuthnathawktute leh market awmze nei taka kan thlunzawm theih hunah hma kan sawn ang,” a ti.
FOCUS Project huaihawt hian Buyer Seller Meet hi 2023 July khan neih a lo ni tawh a, rahchhuah tha tak hmuh niin, Aizawla ei leh in siam leh zuar thinten farmer engemawzat nen mumal takin sumdawnna ngelnghet tak an kalpui a, tun thlengin an la indawr a ni.
Thlai/thei thartute leh eitur sawngbawltute indawr tawn
