Thlasik hnaih tawh lamah Taylor Swift ‘Cruel Summer’ a Hot ber

Thlasik hnaih tawh lamah Taylor Swift ‘Cruel Summer’ a Hot ber
Taylor Swift hla, Eras Tour a neih hnua rawn hit thar leh ta ‘Cruel Summer’ chu Billboard Hot 100 (singles) chart-ah No.9 atangin No.1-ah a invawrh a, he chart-a Swift hla No.1 kai thei 10-na a ni. He hla hi a hmain No.3 te pawh a lo thleng zak zak tawh a, 2019-a a album ‘Lover’ ami kha niin, Lover album a tlangzarh atanga kum li-naah a No.1 ta a ni. Hetihrual hian Bad Bunny ‘Monaco’ pawh chart top 5-a a debut a bawk e.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Cruel Summer hian radio airplay-ah ngaithlatu maktaduai 77.8 neiin, stream maktaduai 18.6 leh sales 41,000 a tling theia, hei hi chart-ah a No.1 pui ta a ni. Cruel Summer hla hi October ni 18 khan a live version, The Eras Tour a neih laia a record bakah LP Giobbi remix an tichhuak a, October ni 13-ah Taylor Swift: The Eras Tour, concert movie an tlangzarh bawk a, hei hian ‘Cruel Summer’ hla pawh hi a tilar thar leh a ni.
‘Cruen Summer’ hi 2019-a Swift album ‘Lover’ ami kha niin, September, 2019 khan Hot 100 chart No.29-ah a lo debut tawh a, kumin June thla khan a single angin a tichhuak thar chauh a, Swift hian a Eras Tour concert-naah te a perform deuh ziah bawk a, hei hian a hla hi kum li hnuah a vawrh lar thar leh ta hle a, ‘Lover’ album atanga Hot 100 chart-a No.1 kai thei awm chhun a ni ta rih a ni. He album atanga a single hmasa ‘Mw!’ featuring Brendon Urie leh ‘You Need To Calm Down’ chu No.2 an kai a ni.
Taylor Swift hi Billboard Hot 100 chart-a No.1 kai thei hla 10 chin nei thei hi zaithiam 11-na niin, he chart-a No.1 kai thei hla ngah ber chu The Beatles (20) an ni a, Mariah Carey (19), Rihanna (14), Drake (13), Michael Jackson (13), Madonna (12), The Supremes (12), Whitney Houston (11), Janet Jackson (10), Stevie Wonder (10) leh Taylor Swift (10) ten an dawt a ni.
Chart No.1 hlui Doja Cat ‘Paint the Town Red’ chu No.4 atangin No.2 a kai thar leh a, SZA ‘Snooze’ pawh No.7 atangin No.3-ah a invawrh thar leh ta bawk. Drake ‘IDGAF’ featuring Yeat chu No.2 atangin No.4-ah a tawlh ta bawk.
Chart No.1 hlui Zach Bryan ‘I Remember Everything’ featuring Kacey Musgraves chu No.14 atangin No.6 a kai thar leh a, Luke Combs-a’n Tracy Chapman hla hlui a cover ‘Fast Car’ pawh No.13 atangin No.7 a kai thar leh a, kar khat No.1 Drake ‘First Person Shooter’ featuring J. Cole chu No.8-ah a tawlh a, chart No.1 hlui Morgan Wallen ‘Last Night’ chu No.19 atangin No.9-ah a invawrh thar leh a, Morgan Wallen hla tho “Thinkin’ Bout Me’ chu No.25 atangin No.10-ah a invawrh thar ve leh ta bawk.