Mizoram sik leh sa inthlak danglam dan chhinchhiah chinah thlasik laia khaw vawh dan chu kumtin a zual zel bakah nipui laia khaw lum dan kumtin a zual zel tih chu State Meteorological Centre hriat dan a ni.
Directorate of Science & Technology-a State Meteorological Centre hotute chuan, Mizoram bika chhinchhiah a nih chinah 2017 January 13 chu a la vawh ber tum niin, degree celcius 2.7-a vawt a ni. Khaw vawh dan leh lum dan a zual zel rual hian kumtina khaw awmdan chawhrualin danglamna em em a awm lo tih The Aizawl Post an hrilh.
Kum 2023 chhunga khaw vawh ber tum chu December 15 niin, degree celcius 15 a ni a; kuminah January 3 kha a vawh ber tum niin, degree celcius 12 a ni. Nikum December aiin kumin January hian khaw vawt a zual chho zel zawk a, nikum December-ah chawhrualin degree celcius 15.8 niin, kumin January-ah chawhrualin degree celcius 13.3 a ni.
Kum 1985 atanga 2023 thlenga chhinchhiah a nih danin, kum 1995 chu khaw lum ber tum niin, chawhrualin degree celcius 23.6 a lum a ni. Kum 2016 chu khaw vawh ber tum niin, chawhrualin degree celcius 18.7-a vawt a ni. Kumtina khaw lum leh vawh dan chawhrual hian a danglamna em em hmuh tur a awm lem lo tih an sawi.
Mizoram puma khaw lum leh vawh dan tehnaa kan rin leh pawm ber chu New Capital Complex (MINECO) a khaw lum leh vawt tehna khawl niin, district hrang hranga an khawl neih chu enkawltu tur an awm loh avangin hman a ni ngai lo tih thu dawn a ni. Hmun khat ami chauh hman a nih avang hian Mizoram hmun hrang hranga awmte tan khaw chin tehna hi a dik diak diak vek lem loa ngaih a ni a. Mizoram pum khaw chin dik lehzuala hriat theih nan district hrang hrangah thawktu an awm a pawimawh hle tih sawi a ni.