Thlawhna tlaa ruang 251 finfiah, an chhungteah 247 hlan
Ahmedabad Civil Hospital Superintendent Dr. Rakesh Joshi-a chuan tun hnaia Ahmedabad-a Air India thlawhna tlaa thite chu DNA hmangin mi 251 finfiah a nih tawh thu leh heng zinga ruang 247 chu an chhungte hnenah hlan an ni tawh tih a sawi.
Pathianni zan khan ruang pahnih chu United Kingdom-a vui turin thawn chhuah a ni a. Thawhtanni khan ruang pathum pek chhuah niin Nilaini hian ruang pahnih pek leh an ni bawk.
Dr. Joshi chuan ruang an finfiah tawh zinga 176 chu Indian an ni a, Portuguese pasarih, British 49, Canadian pakhat leh passenger ni lo 12 an ni tih a sawi.
An chhungte hnenah hlan tawh ruang finfiah zinga 20 chu passenger ni lo an ni a, heng zinga pariat chu an hmel atang pawhin a hriat theih a, kar liam taah khan an chhungte hnenah hlan an ni a. Heng zingah doctor pali an tel a, DNA hmanga finfiah kher pawh ngai lo an ni.
June 12-a London pana thlawk, Air India Dreamliner thlawhna hi Sardar Vallabhbhai Patel International Airport atanga a thlawh chhuah hnu lawkah tlain a chuang mi 242 zinga 241 an dam chhuak.
Thlawhna hi medical college residential block-ah tlain leia lo awm awm tam tak, mi 30 vel an thi tel.
Dr. Joshi-a chuan ruang an thawn chhuah tawh 247-te hi India ram chhungah pawh state hrang hrang an ni tih a sawi. A tam ber chu Gujarat-ah niin ruang 175 thawn chhuah a ni a, heng zinga 70 hi Ahmedabad khawpuia mi a ni.
Gujarat pawn lamah chuan Maharashtra mi tam berin ruang 12 thawn chhuah an ni a. Rajasthan-ah pathum an ni bawk.
Thlawhna tlaa ruang 251 finfiah, an chhungteah 247 hlan
