Thli leh ruah thawk thei vangin
June 13 hmaa rawn luh loh a him
– Mizoram sawrkar
Khawchin thlirin thli leh ruahpui thawk thei reng a la ni a, Mizorama zin tumte tan 2025 June 13 hnulam tinzawn zawk turin state sawrkar chuan a hriattir.
Sawrkar thuchhuak chuan, Mizoram pumah ruah nasa tak a sur avangin chhiatna hrang hrang – leimin, lungrem chim, lung tla, tuilian leh Saberekakhuangkaih a thleng a, nunna chan phah an awm bawk a. Khuarel chhiatna thleng avang hian district hrang hrangah mipui nunphung a buai phah nasa hle tih a sawi.
District tina bawrhsap-te kaihhruaiin District Disaster Management Authority chuan chhiatna thlenna hmun vilin chhiat tawkte chhawmdawl hna an thawk zel a. Hei vang hian district thuneituten ram pawn atanga VIP lo zinte pawh lo mikhual leh dawnsawn kawngah harsatna an tawk tih a sawi a ni.
“Indian Meteorological Department (IMD) Regional Meteorological Centre, Guwahati puan lawk danin, thlipui leh ruahpui thawk reng thei dinhmunah Mizoram a la lang a; chhiatna thleng mek leh thleng zel thei thlirin, mipui him tlan zawkna atan Mizoram sawrkar chuan, sawrkar laipui leh state dang atanga mi pawimawh lo zin turte chu 2025 June 13 hnulam hun remchang dang ruahman hram turin kan ngen,” a ti.
He thuchhuah hi mitinte him tlan zawk theihna tur leh chhiatna thleng tih ziaawm leh chhanchhuah leh chhawmdawl hna chak zawka hlenchhuah a nih theihnana tih a nih thu a sawi a ni.
Thli leh ruah thawk thei vangin June 13 hmaa rawn luh loh a him – Mizoram sawrkar
