April 26 zan atanga Mizoram hmun thenkhata thli leh ruah thawk chuan chenna in a tichhe nual tawh a, mihring nunna chan phah leh hliam na tuar erawh an awm lo.
Disaster Management & Rehabilitation Department-in a hriat theih chinah Aizawl district, Lunglei district leh Kolasib district-in an tuar deuh ber a. Sialsukah chenna in chhe vek 2, chhe nasa 6, chhe nel nual 12 leh ran in a tihchhiat 11 a awm a. Electric ban 9 tlu in a tih chet 5 a awm bawk. Lungsei khuaah chenna in chhe vek 1, chhe nasa 1 leh chhe nel nual 17 a awm a; Chamring leh Samlukhaiah chenna in pakhat ve ve a chhe nel nual a ni.
Lunglei district a nghawng na bawk a. Khaw 16 velah chenna in bakah sikul leh kohhran hmunhma chhia a awm nual. Heng khuaa chenna in, sawrkar hmun leh kohhran hmuna in chhia hi 30 chuang hret niin, ran in chhia leh leimin avanga harsatna tenau tawh a awm bawk.
Serchhip district khua/ veng pali velah chenna in chhia a awm a; Siaha district khaw hnih leh Kolasib district khaw pali velah chenna in chhe nel nual sawi tur a awm a, chhe nasa tak erawh a awm hriat a ni lo.
Hetihlai hian district dang zawngah chuan chhiatna report dawn a awm lo a ni.
Chief minister Lalduhoma chuan, to haw in thli na tham tak a rawn ken tel avangin hmun thenkhatah chhiatna a thlen a, chhiatna tawkte a khawngaih hle tih sawiin, sawrkarin a thlahthlam dawn loa, dan anga tanpuina awm thei apiang a tih sak dawn tih a sawi. Mipui kan him tlan theihnan mitin fimkhur a, veng leh khuaah chhiatna a thlen palh chuan rang taka sawrkar lama a mawhphurtute hriattir zel turin a ngen tih a sawi bawk.
Thli leh ruah thawkin chenna in tichhe nual
