Daily Newspaper

Thlitfim zingah Nick Pope

19

2019-20 season chhunga English Premier League player tha ber thlanchhuah tura thlitfim mi pasarih hming tarlan a ni a. Thlifim mi pasarih zingah rin loh takin Burnley si nghak Nick Pope a tel.

Premier League Player of the Season thlanchhuah turah hian rinkai zual mi pasarih hming tarlan a ni a, EPL champion Liverpool player pathum ngawt an tel. Liverpool player zingah hian football chanchin ziaktuten player tha bera an thlan Jordan Henderson a langsar leh hle a. Reds player zingah Sadio Mane leh defender goal thun thei Trent Alexander-Arnold te an tel. Reds tlarhma player pawimawh Sadio Mane hian EPL-ah goal 18 lai a thun tling a, an champion theih nana player thawhhlawk tak a ni. Defender zinga goal thun leh assist nei thei tak Alexander-Arnold hi Young Player award dawng thei turin chhawpchhuah a ni bawk a, rawlthar tha ber chawimawina phei hi chu a dawng ngei tura ngaih a ni hial a ni.

Premier League-ah champion lo mahse Manchester City midfielder pawimawh Kevin de Bruyne chu EPL player tha ber chawimawina dawng tura rinkai ber pawl a ni. De Bruyne hian 2019-20 season chhung khan assist vawi 20 zet a nei a, season khat chhunga EPL player zinga assist ngah ber Thiery Henry record a nih rual hial a ni. City hi League Cup-ah a hruai thleng a, UCL-ah quarter final lut ngei tura ngaih niin, champion tura rinkai zinga mi an ni a, an player pawimawh, an game siamtu chu Belgium midfielder De Bruyne hi a ni.

EPL topscorer ni thei upa ber Jamie Vardy chu hming langsar zingah a tel bawk. Jamie Vardy hian goal 23 a thun a, Aubameyang leh Dannu Ings te chungah chuangin Golden Boot a dawng. Vardy bakah hian goal 22 thun a, season tawp dawn lama chetha tak Danny Ings pawh thlitfim mi pasarih zingah a tel ve bawk.

Premier League Player of the Season dawng thei tur thlitfim zingah rin loh taka lang nawlh a awm a, chu chu Burnley si nghak Nick Pope a ni. EPL-ah hian si nghak tha tak tak an awm a, Liverpool champion puitu Alison Becker, Edersom leh David de Gea te thatzia chu tlang hriat a ni. Chutihlai chuan EPL-ah 10-na ni pha tawk Burnley si nghak Nick Pope a lang nawlh hian mak tih a hlawh a, mimal taka a chetthatzia a tilang chiang viau thung.

Nick Pope hian season liam taah khan clean sheet vawi 15 a nei a, Manchester City si nghak Ederson tih loha clean sheet ngah ber a ni. Burnley tan a chetthat em vang hian EPL-a si nghak tha ber Golden Glove award a dawng hial a ni. Anfield-ah ngei Liverpool nen 1-1 a an inhnehtawk tumin Nick Pope hian save turu zet zet a nei a, EPL champion lakah a chetthat em vang hian a hming a chher phah hle nghe nghe a ni.

THE AIZAWL POST
~Infiamna~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy