Thluak
thaho pawla tel thei naupang ber
Khawvela mi thluak tha, IQ sang te chauh an tel theihna pawl a awm a, Mensa an ti. He pawla tel pha nih chu chapopui tham tur pawh a ni, IQ 132 aia hniam tan a tel ve theih tlat loh. Chu pawlah chuan mipa naupang kum 2 mi a tel ve a, mipa zinga Mensa a tel thei naupang ber a ni.
A hming chu Joseph Harris-Birtill a ni a, kum 2 leh ni 182 a upa a nihin Mensa-ah a tel thei a, Guinness World Records a siam ta a ni. He mipa naupang hi thla sarih mi lek a nih laiin thumal a lam fuh thei tawh a, tunah te chuan a riin lehkha a chhiar thei tawh a, tawng chi hrang hrangin number a chhiar thei a, Morse code leh periodic table te a zir leh mek a, piano tum a zir tel bawk. Kum 2 mi lek a la nih si chu!
A nu leh pate pawh mi thluak tha tak niin, Dr. Rose leh David Harris-Birtill te fapa a ni a, a kum a tlin hma atangin a thil thiam leh tih theih te an hmuhin a nu le pa te chuan naupang danglam tak a ni tih an hrethiam nghal mai a ni. Rose chuan, “Thla nga a tlinin a bawkkhup thei a, thla sarih a tlin a thumal thiam hmasak ber a sawi thei a, kum khat leh thla thum a tlinin lehkhabu pakhat a chhiar chhuak thei a, kum 2 leh thla thum a nihin minute 10 chhung ring tha takin bahlah lovin a chhiar thei a, tawng hrang chi ngain number 1-10 a chhiar thiam a, number 100 aia tam pawh a let zawng pawhin a sawi thei,” a ti. Rose chuan an fapa hian tunah chuan Morse code bakah Greek hawrawp a tuipui a, periodic table a tuipui thar bakah piano tum a zir niin a sawi bawk.
Thluak \haho pawla tel thei naupang ber
