Thluak tana chaw tha

WHO chuan khawvelah dementia natna nei an puang nasa hle niin an report a, tunah hian dimentia nei hi khawvelah mi maktaduai 50 vel awm angin an chhut a, kumtin dementia nei thar mi maktaduai 7.7 vel awm angin an chhut bawk.
Dementia chu thluak lam natna a ni a, thil an theihnghilh a, an hriatrengna te an hloh thin. Tunlaiah kum lama naupang te te pawh haihawt tak tak kan tam ta hle. A chhan hi chi hrang hrang a awm thei a, mut that loh vang te, stress vang te, taksa sawizawi tawk loh vang te leh kan lifestyle leh kan chhehvela thil thleng vang te pawh a ni thei a, chutih laiin a chhan ni thei zinga lian ber chu kan ei leh in a ni. Kan thluak hrisel nan kan ei leh in a pawimawh hle a ni.
Tun tumah hian Times of India health section-in thluak tana chaw tha ni a an sawi te kan rawn tarlang e.
1. Artui- Artui chhungmu-ah hian choline a awm a, chu chu thluak tana chaw tha a ni a, a bik takin short term memory atan a tha hle.
2. Nihawi chi- Nihawi chi (sunflower seed)-ah hian Vitamin E a tam hle a, chu chu thluak tana chaw tha tak a ni a, thil hriat reng theihna atan a tha hle. Choline pawh a pai tam hle a, chuvangin tel (oil)-ah pawh sunflower oil hman a tha.
3. Sangha thau- Sangha thauah hian Omega 3 fatty acids a awm a, chu chu thluak hnathawh tih chaktu leh thluak tithangtu a ni. Nu naupai lai te tan kar khatah vawi 2-3 tak sangha ei a tha a, chu chu nau lo piang tur thluak tan a tha hle. Salmon leh tuna te chu sanghaah pawh Omega 3 tamna ber a ni.
4. Theihmu- Theihmu (berries) chi hrang hrang- strawberries, blackberries leh blueberries te hi antioxidant tha tak an ni a, thluak-in signal a thawnna kawng tithatu an ni. Theihmute hian thluak cell thi tur leh vûng tue a veng thei bawk. Hei bakah hian demebtia leh Alzheimer te pawh a veng/tikhawtlai thei.
5. Spinach- Taksa tana chawtha a nih bakah spinach hian lutein a pai tham hle a, chu chu antioxidant chak tak a ni. Thil hriat/chhinchhiah theihna tlahniam tur a veng thei. Lutein hian thluak hnathawh a tichak a, thil ziar thiam theihna leh hriat reng theihna a tichak thei bawk.
6. Beets- Bulbawk sen chi hi thlai zingah chuan nitrates pai tam ber pawl a ni a, thluaka thisen luang vel tichak theitu a ni a, thluak hnathawh a tichak thei.
7. Nuts- Almonds, sazupumpui (cashew nut), peanut, khawkherh te hi vitamin E pai tam an ni. Nuts thum khatah hian kan mamawh tawk vitamin E a awm a, thluak hnathawh tichaktu an ni.
8. Dark chocolate- Dark chocolate-ah hian natural stimulant leh antioxidant a tam hle a, mahse, tum khatah tam deuh a ei tur a ni lo, dark chocolate-ah hian caffeine a awm bawk a, hei hian mood ti tha turin thluak a pui thei bawk.