Daily Newspaper

Thu diklo hmangin Pu Duhoma’n mipui hruaisual a tum – MNYF

9

Mizoram sawrkar sum hmuh thenkhat Covid-19 dona tura hmuh anga MLA Lalduhoma’n a sawi mai chu thu dik tawk lo hmanga mipui rilru hruaisual tumna nia an ngaih thu MNF Thalai chuan an sawi.

Thuthar thehdarhtute an kawmnaah MNF Thalai Hqrs. hruaitute chuan, ZPM MLA Pu Lalduhoma hian Covid-19 dona kaihhnawiha Mizoram sawrkarin sum a hman theih tur cheng vaibelchhe 1061.03 hmuh a nih thu a sawi chu vawikhat pawh la sawrkar lo leh budget la pharh ngai lo a nih avangin budget a hrechiang lo hleah an ngai tih an sawi.

Sawrkar sum hmuhna nia Pu Lalduhoma’n a sawi zinga pakhat, State Disaster Response Fund (SDRF) 1st instalment nuai 2350 chu a vaia Covid-19 dona atana hman tur angin a sawi a ni tiin, hei hi mipui bum tumnaah an ngai tih an sawi.

“Ministry of Home Affairs kaihhruaina ang chuan SDRF sum hi zaa 35 chauh Covid-19 dona thilah hman theih a ni a. One time special dispensation (loan) a nuai 27100 Covid dona atana hman tur anga a sawite hi a fuh lo hle a. He sum hi kum 2019-2020 lama central-in an state sum hmuhna hnar ber pakhat ‘share of taxes’ min pek tlem avangin, loan puk min phalsak avanga puk a ni a, hei vang hian ‘Mizoram Fiscal Responsibility and Budget Management Amendment Bill 2020’ pawh Assembly House-ah tun session hnuhnung ber khan pass a ni nghe nghe,” an ti.

Devolution of Taxes, March-September 2020-a nuai 71100 hmuh pawh Covid-19 do nana hmuh niloin. state sum hnar pangngai, sawrkar hnathawk hlawh leh pension hlawh atana hman ber thin a ni tih MNF Thalai hruaitute chuan an sawi a. “Hetianga thu dik tawk lo hmanga mipui hruaisual theihna tur thu sawi fo tawh lo turin MLA hi kan chah a ni,” an ti.

Tunhnaia ZPM MLA Pu Lalduhoma vekin ZPM chu party thangduang ber angin a sawi tih pawh MNF Thalai hian sawiin, “tun VC inthlanah VC 558-ah VC 38 chauh an la a, local council inthlanah LC 83-ah LC 2 chauh an la leh bawk a, an artelukawn lo chauh a ni. Hei mai a ni lo, ZPM an nih atanga reilote hnuah MPC leh ZNP a peng leh tawh a, hei hi Pu Lalduhoma’n party thangduang bera a sawi a ni a, an lungawina number a tlem nge an beisei chin a sang lo hrim hrim kan hre lo,” an ti bawk.

Hei bakah hian Congress Thalai-in ram sum dinhmun thlir hauh loa, an sawrkar laia thisen lakna man pawh a thlawna ti thei loten MNF sawrkarin Covid-19 dona a kalpui dan an sawisel chu a zahtheih lohthlak hle an ngaih thu MNF Thalai hruaitute hian an sawi.

“Congress Thalai president-in RT-PCR test man Rs.4500 char char hmang anga a sawi hi thil a hre chiang lo hleah kan ngai a, Rs.4500 chawi turte hi mahni duhthua test-te leh Covid free certificate dilte tan a ni; a dang chu subsidized leh free test vek zawk a ni,” an ti.

Theihtawpa sawrkar leh mipui thawhhona zarah Mizoram chu India ram state-a Covid case nei tlem ber niin active case pawh Sikkim tih lohah a tlem ber a nih thu te; nitin deuhthaw dama chhuak (discharged) an awm zel thu leh India rama Covid-19 thihpuitu awm lohna state awmchhun kan nih thu te an sawi.

Tunhnaia VC/LC inthlana MNF party chetthat chhan pawh mipuiin Covid-19 dona kawngah sawrkar hmalakna an rintawkzia an lantirnaah an ngai tia sawiin, “India rama Covid-19 dona kawnga titha lawmman pek tur nise, Mizoram hi a dawng hmasa ber kan nih ngei kan ring hial a ni,” an ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy