Daily Newspaper

Thu thlen duh tan CM leh Health minister inhawng

12

Covid-19 dona kaihhnawihah sawrkar finchhuah duh tan hmaichhana inkawm turin chief minister leh Health minister an inhawng reng niin MNF Thalai chuan an sawi.

Thuchhuah siamin MNF Thalai chuan, Covid-19 leng mekah India ram state-ah Mizoram chu case nei tlem ber, active case pawh Sikkim tih lohah chuan nei tlem ber leh thihpui la awm lo awmchhun state kan ni, tiin, ‘Hei hi sawrkar leh khua/veng tina NGO-te nen thawhhona tha tak vang a ni a, ram pum huap ngaihtuahin sawrkar hmalakna hi a tha hle,’ a ti.

Kohhran leh mipui pawhin sum leh pai leh tawngtaina nen sawrkar an tawiawm laiin, sawisel tur dap reng an awm tih sawiin, ‘A bikin Congress party hian sawrkar tha tihchak aia hrileng denchhena sawrkar tha tihthum a tumna hian mipui a hmin lo a, a thawhhlawk lo ber leh che chhuak lo ber a phunchiar bera tang ringawt loin, sawrkar finchhuah an duh a nih chuan a thlenna tur diktakah thlen se, hemi atana hmaichhana inkawm pawh CM Pu Zoramthanga leh Health minister Dr R. Lalthangliana te an inhawng reng a ni,’ MNF Thalai chuan an ti.

Mizoram sawrkar hmalakna demna atan state dang hmalak dan tarlan chingten state dang aia Mizoram that zawkna tam tak an haider leh si nia sawiin, Assam-in Covid kaite Rs.6000 zel pai anga an sawi pawh, kum thara inthlan hmachhawn tur an nih denchhena hma la nia an lan thu a tarlang.

State economy leh state awmna azir te, hmanraw neih dan azirtein state hrang hrang test man a inang diak diak thei lo tih hria in, ICMR-in kumin March 17-a RT-PCR test man a bithliah Rs.4500 chu May 26 khan sut lehin state tinte chu anmahni rate insiam turin thuneihna a pe tih MNF Thalai hian an sawi. ‘March 17-a RT-PCR test man bithliahah khan state tam tak chuan ICMR rate hi an zawm nghal a, May 26-a rate bithliah tihbo hnuah state thenkhat chuan test man an tihniam ve leh chauh a, Mizoram sawrkar chuan July 30-ah test man hi a bithliah tan chauh zawk a ni,’ a ti.

Mizorama RT-PCR test man Rs.2500 chu India ramah chuan a tlanglawn a nih thu te, RAgT phei chu state lian zawkte pawhin man chawia an test laiin, tun thlengin Mizoramah a thlawna kalpui a nih thute a sawi. RT-PCR test-na subsidize loha Rs.4500 tih pawh, full rate chu Rs. 5539 niin, August 24-ah sawrkarin rate a siamna hriattirna chu siamtha lehin, mipui tana zangkhai tur zawnga man tlawm zawka sawrkarin rate a bithliah thute a sawi bawk. ‘Hetihlai hian nitina test tam zawk, contact tracing tihnaa test ngaite, ICMR-in test tura a tihte test man a thlawn veka kalpui a ni a, mahni sensoa test hi mi tlemte chauh an ni,’ thuchhuah chuan a ti.

Sawrkarin mi tam zawk a free-a test a kalpui theih chan chu CM Relief Fund-a ruling MLA-te leh independent MLA-ten ui loa MLA fund an thawh vangte, mipui leh pawl hrang hrangten sum an thawhkhawm avangte a nih thu MNF Thalai thuchhuah hian a tarlang bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy