Manipur-a chi leh chi buainain a tuam district pangaah thuneitute hnenah mipuiin silai 42 leh a kartut thahnem tak an hlan leh tih Pathianni khan police-in an sawi.
Heng ralthuamte hi Imphal West leh East, Churachandpur, Bishnupur leh Tamenglong district-ah Inrinni khan hlan an ni tih police officer-in a sawi.
Bishnupur district-ah pistol pahnih, grenade paruk leh kartut 75 chuang hlan a ni a. Tamenglong district-a Kaimai Police Station-ah tualchher silai 17, pompi (tualchher mortar) pakua leh kartut eng emaw zat hlan a ni.
Yaingangpokpi, Porompat, Churachandpur leh Lamsang Police Station-ah te silai 10 leh a karkut thahnem tak hlan a ni tih police officer chuan a sawi.
Sairemkhul, Imphal West district-a dap beihpui an thlaknaah INSAS LMG leh a magazine, a mi 20 awmna, AK-56 rifle pakhat, SLR rifle pathum, SMG 9mm carbine pakhat, .303 rifle pakhat, DBBL gun pakhat, a dehpuahna tel lo grenade pali, Chinese hand grenade pakhat leh thil dang eng emaw zat an man chhuak.
Kangpokpi district-a Thingsat tlangdunga Mark Hill-ah dan lova siam bunker pahnih tihchhiat a ni a. Kangpokpi leh Imphal East district-a Wakan tlangah bunker dang pathum tihchhiat a ni bawk.
Governor Ajay Kumar Bhalla chuan February 20 khan venhim hna thawktute hmanrua an ruksak leh dan lova ralthuam kawlte chu ni sarih chhunga thuneitute hnena hlan let turin a ti.
Ni sarih chhung hian ralthuam 300 chuang hlan niin a tam ber hi phai district atangin a ni.
Mipuiin an ngen angin ralthuam kawl hlan let theih hun hi March 6 tlai dar 04:00 thleng pawh sei zui a ni.
Manipur-ah hian May, 2023 atang khan Meitei leh Kuki-Zo inkarah buaina chhuakin mi 250 chuang an thi tawh a. Mi tam takin leh leh chânin an chhuahsan bawk.
Sorkar laipui chuan Chief Minister N Biren Singh a bân hnuah February 13 khan President’s Rule-ah a dah a. Kum 2027 thleng hun la nei state assembly pawh tihtawp lailawk rih a ni mek bawk.
Thuneitute hnenah ralthuam 42 hlan let
