Daily Newspaper

Thupui neia intihsiak

12

Editorial…..

Kum 2019-a YMA inkhawmpui vawi 72-na chuan 2019-2-21 chhunga YMA kumpuan thupui atan “Zirna Uar” tih a thlang a. Hemi denchhen hian video clip siama intihsiakna huaihawt niin a result chu nimin khan Central YMA hall-ah puan a ni ta a. YMA hian zirna hi a ngai pawimawh hle a, kum 1996 leh 1997 pawh khan “zirna uar” tih hi YMA kumpuan atan hman a lo ni tawh a. Kumpuan behchhana hetianga intihsiakna huaihawt a ni hian zirna kawnga hmasawnna tha tak pawchhuak se a duhawm hle.

Tunhma deuh khan, HIV/AIDS dona lamhawia thawnthu tawi inziahsiak buatsaih a ni a, lawmman te pawh sem a ni a, mahse a hnu lamah lawmman dawngtute thuziak kha mipuiin an chhiar theih tura thehdarh zui a ni ta lem lo niin a lang a. Hetiang deuh hian, department thenkhatin thupui tha tak tak hmanga thuziak, hla phuah, lemziak etc.. intihsiakna an huaihawt hian, lawmman dawngtute kutchhuak kha mipuiin zau zawka an lo hriat a, an chhawr tangkai theih turin thehdarh a ni zui mumal ngai lo niin a lang bawk. Intihsiakna huaihawt a nih chhan kha, lawmman ni satliah mai lovin, lawmman dawng pha khawpa ngaihtuahna sengtute kutchhuak kha a zau thei ang bera mipui hnena thehdarh a, chu chu message atana hman tangkai kha intihsiak huaihawt chhan a ni tur a ni a, mahse chutiang lam chu kan hawi leh lem si lo thin niawm tak a ni.

Hetianga thupui tha tak tak hmanga intihsiakna huaihawt thin hi a tha a, mahse intihsiak huaihawt a nih chhan berin a nihna tur anga mipui hnen a thleng leh mang si lo a nih chuan insensona hlawk lo tak a ni thei a. Insenso rau rau takah chuan, awmze nei leh hlawk zawka mipuiin an chhawr tangkai theih tura buaipui law law hi hma kan sawnpui theih dan tur chu a ni ngei ang.

Tuna YMA-in intihsiakna a huaihawt ang hi chu video clip a nih avangin thehdarhna lamah social media tangkai taka hman theih a ni dawn a. Zirna inah te pawh zirlaiten a huhova an en theih tura buatsaih theih a ni bawk ang a, a tangkai hlein a rinawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy