Tih tawp an tum leh ti tura an insawi ang an ti thei lo – K Vanlalvena

Tih tawp an tum leh ti tura an insawi ang an ti thei lo
– K Vanlalvena
ZPM-in kuhva tawlhruk titawp thei angin mipuiah an inzuar a, an titawp thei bik loa, thalai tan employment generate thei angin an insawi a, an ti thei chuang lo, tiin MNF hruaitu K Vanlalvena chuan a sawi.
Zirtawpnia Mizo Hnam Run inkhawmah MNF adviser K Vanlalvena chuan Myanmar atanga kuhva ro lo lut chu MNF sawrkar laiin an sawisel luai luai a, MNF an mawhpuh a. ZPM a sawrkar hnuah a ngai rengin a lut tho a, MNF hunlaia sawiseltute an ngawi ta thap tih a sawi. “Campaign laiin kuhva ro lo lut hi titawp thei tur angin mipuiah an inzuar a, ZPM sawrkar hian a titawp ngei tur a ni,” a ti.
ZPM chu thalaiten an bawh reng dawn loa, an beidawng mek niin a sawi. “ZPM sawrkarin thalaite tan employment generate thei tur angin an inzuar a, an ti leh thei si lo. Kan ramah factory leh company a tam thei ang ber din a, kan ramah thalaite tan hnathawh tur a tam thei ang ber siam a tul,” a ti bawk.
Sawrkar inrawlh lohin thlai tharchhuah hralhna rate a tha zawk tih Rajya Sabha MP K Vanlalvena hian a sawi. Hmarcha chu englai mahin a rate a chhe ngai loa, sawrkar inrawlh a tul lo tih sawiin, hmunphiah hralh chungchangah MNF sawrkar a inrawlh ngai loa, a chingtute leh a leitute an indawr mai thin tih a sawi.
“Congress sawrkar laiin ‘Hnam Chhantu Pawl’ kaltlangin a inrawlh a, a buai vek zawk a. Sawrkar a inrawlh chhunzawm duh tawh lo. ZPM sawrkar a inrawlh a, Sundar Ali sawichhe thin khan Sundar Ali thiante ho ‘Vai company” tho an dawr leh si. Hmunphiah lei tura an biakte leh sumdawng lian dangten buaina neiin hmunphiah hralhnaah kuthnathawktuten harsatna an tawh phah zawk,” a ti.
Sawhthing chu MP a nihna angin Committee-ah China atanga India-in lalut tawh lo turin a duh tih a sawichhuah thu a sawi a. North East state atanga sawhthing thar chuan India ram a chawm thei tih a sawi.
“ZPM sawrkar inrawlh miah loin, MNF sawrkar inrawlh miah loin, kum 2022-2024 chhung khan rate tha takin sawhthing chingtuten sawhthing an hralh thei. State dang thar dan zirchiang se, ZPM sawrkar inrawlh lo se sawhthing chingtute hian rate tha zawkin an hralh thei ang,” a ti.
Zirtirtu hlawh tam zawk sawrkar school aiin zirtirtu hlawh tlem zawk private school-ah zirlai an tam zawk chu Pu Lalchhandama Ralte minister-na hnuaiah primary leh middle section-ah engemawzat siamthat a ni a, siamthar zel a tul, tiin, an sawrkar leh a nih chuan huaisen tak a siamtha tura hma lak a tul tih a sawi a ni.