Daily Newspaper

‘TIH ZIAK A NI’ TIH HI

11

PC Thangzikpuia

Isua’n a hnenah,“Setan, kal bo daih rawh! ‘Lalpa i Pathian chibai bûk la, amâ rawng chauh bâwl rawh,’ tih ziak a ni,” a ti a. (Mathaia 4:10)

Mizo tawng Bible-a Isua’n amah thlêmtu Setana a chhânnaah hian, “…tih ziak a ni,” tih tawngkam hi kan hmu nual a, hmun dangah pawh he tawngkam hi hmuh tur a awm bawk niin a lang. He tawngkam hi Mizo tawng dik atân chhawm nun zui zel tlâk a ni em tih i han bih ho lawk teh ang u.

Mizo tawng kal phung pangngaiah chuan tawng kau chheh hmasa zâwk (subordinate clause) leh tawng kau chheh hnuhnung zâwk (principal clause) zawm nâna ‘tih’ hi conjunction atâna kan hman a, thu khàrna (ending particle) atâna particle ‘a’ leh stative verb ‘ni’ kan hman a, ‘tih…a ni’ tia thu hmâwr kan bàwkna ang chi-ah hi chuan, conjunction ‘tih’ leh ‘a ni’ tih inkârah hian thu dang tla zep tel ve awm lova transitive verb thumal chauh a tlâk zeh chuan, chu transitive verb rawn tla zep chu modified form nei chi a nih chuan a subjunctive mood form zel a rawn tla zep thin a.

Entir nân: “Mi sual a ni lo tih hriat a ni,” tia kan sawinaah te hian, ‘tih…a ni’ tih inkâra thu dang tla zep ve dang awm miah lova transitive verb thumal kan hman ‘hriat’ hi a subjunctive mood form a ni ta a. Hetah hian a indicative mood form (root word) ‘hria’ tih hi zepin, “Mi sual a ni lo tih hria a ni,” tiin sawi ta ila chu tawngkam ulh tak a nih bâkah, thu awmze nei lo a ni hial maithei a ni. Chuvangin, hetiang tawngkamah hi chuan ‘tih…a ni’ tih inkârah hian thu dang tla zep tel ve awm lova transitive verb thumal chauh a tlâk zeh hi chuan, transitive verb thumal lo tla zep hi modified form nei chi a nih chuan a subjunctive mood form zâwk zel kan hman hian tawngkam dik a ni ta thin a ni.

Bible-a Isua thu sawi kan hmuh pawh hi thu ziah sa sawi chhawnna tawngkam ni lovin, thu puan tawh sawi chhawnna tawngkam lo ni ta zâwk sela, “‘…amâ rawng chauh bâwl rawh,’ tih ziak a ni,” tiha transitive verb thumal indicative mood form ‘ziak’ kan cheleknaah chiah hian transitve verb thumal indicative mood form ve bawk ‘puang’ hi han chelek ve leh ta ila, “‘…amâ rawng chauh bâwl rawh,’ tih puang a ni,” tih hi a anpui tawngkam chu a ni ta mai a ni. Heng atang hian, hetiang tawngkama transitive verb thumal indicative mood form zâwk chelek tâk daih mai hi a dik loh dan chu a lang fiah nghal mai àwm e. Mizo tawng kal phung pangngaiah chuan hetianga principal clause lama ‘tih…a ni’ tia thu kan chhehnaa transitive verb thumal indicative mood form kan chelek hi chuan, transitive verb hmâah hian pronoun zep telin, ‘tih ka hria, tih ka puang, tih ka ziak, tih ka sawi…adt.’ kan ti thin zâwk a ni.

A thu hrimah, hetiang tawngkamah hian transitive verb thumal kan hman hi a indicative mood form ni lo, a subjunctive mood form zâwk pawh lo ni ta teh reng pawh ni sela, “‘…amâ rawng chauh bâwl rawh,’ tih ziaha ni,” tih leh, “Hmui leh hnâr tuam uluk tur a ni,’ tih puan a ni,” tih te, “‘…Hetah bawlhhlawh paih suh,’ tih tàr a ni,” tia ‘tih ziah a ni, tih puan a ni, tih tàr a ni’ tih ang chia-a thu chheh hi chu a ulh deuh hrim hrim mai ni hian a lang.

Mizo tawng grammar kal phungah chuan hetianga mi thu ziah leh mi thu sawi, a ngai ngaia kan sawi chhawn lehnaa single quatation mark-a kan khungnaah hi chuan, kan thu sawi chhawn leh a zuitu tawngkam zawm nân hian transitive verb thumal ‘ti’-ah suffix ‘a’ behtirin, ‘…tia ziah a ni’ tiin leh ‘…tia puan a ni’ tih sawi a ni…(awh khaih!) ti tea sawi thin a ni a. Hei bâkah hian, ‘…a ni’ tia thu kan khar lohnaah chuan, ‘…tiin a inziak’ tiin leh ‘tiin an puang’ ti tea sawi mai thin a ni bawk.

Tichuan, kan Bible-a ‘…tih ziak a ni’ tia Isua kan tawngtir thin pawh hi Mizo tawng kal phung tluang pangngai anga kan chheh that dâwn chuan, “‘…amâ rawng chauh bâwl rawh,’ tia ziah a ni,” tiin emaw, “‘…amâ rawng chauh bâwl rawh,’ tiin ziah a ni,” tiin emaw, “‘…amâ rawng chauh bâwl rawh,’ tiin a inziak,” ti emaw tala kan chheh mâm deuh hi a ngai dâwn ta niin a lang a. Chuti a nih loh a, hetiang tawngkama transitive verb thumal indicative mood form kan chelek a, ‘…tih ziak a ni’ tih ang tawngkam ulh hi a dik anga kan pawm zam luih zel dâwn chuan, hri lêng avanga inkharkhip lâia vêng chhûng tlângâu thu puan kan sawi chhawnnaah te pawh, “‘Tu mah pâwnah chhuah loh tur,’ tih puang a ni,” ti tein kan tawng ulh nghut nghut reng mai dâwn a ni.

Mi thenkhat chuan ziaka thu awm kan lo hmuh than tawh hi chu ngaia kan lo neih ngheh hman tawh avangin a dik loh dan pawh kan hmu fiah thei tawh thin lo a. Chu vang chuan kan mi hmasate sûlhnu pawr lâi rawn thur chhuaktute lo hmelhuat lama lo ramtang ta mai tâwk te hi kan awm ta thin a; nimahsela, chutiang chu thil nih dan tur a ni lo a, sûl min lo sutsaktute sûlhnu mâm lo lâi chùl mâmsak kawngah hian thangtharte hìan mawh lian tak kan phur zâwk a ni tih hi hria ila, kan literature-ina hmâ a sâwn zel theih nân Mizo tawnga thu chheh dik loh ang chi te hi ngaimawh ngam zâwk ila, a dika Mizo tawng kan chelek thiam theihna tura inzirtirna ang chi te hi i ngâi pawimawh thar zel zâwk ang u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy