Beyonce chuan Paris, France-a Renaissance tour a neihnaah May ni 24-a boral ta Queen of Rock & Roll Tina Turner puala hun hmangin, Tina Turner chu a entawn ber a nih thu sawiin tun hun a thlen theihna chhan pawh Tina vang a nih thu a sawi.
Beyonce chuan, “Tina Turner pualin second hnih khat hun hman lawk ka duh a. Ka fan in nih chuan Tina Turner fan pawh in ni tihna a ni. Tina Turner awm lo se he stage-ah hian ka ding lo ang, chuvangin invaiin ring taka au turin ka duh che u a ni, tichuan in hmangaihna a lo tem thei ang. A ropuina hmu ve theia ka awm hi vannei ka inti takzet a ni,” a ti.
Tina Turner thih hlimchhawnah khan Beyonce hian a website-ah Turner pualin, “Ka lalnu duhawm. Tawpchin nei lovin ka duh che a ni. Min tiphurtu leh he kawng i sah kuak sa min zawh tirtu i nih avangin ka lawm takzet a. Chakna leh chhelna i ni. Thiltihtheihna entirna i ni. I ngilneihna kan tem ve hi kan vannei a, i huhang duhawm tak hi chatuanin a awm reng tawh ang. I thil tih tawh zawng zawng avangin lawmthu kan hrilh che a ni,” a ti bawk.
Beyonce leh Tina Turner hian an induhsakna an lo tilang fo tawh a, 2008 khan 50th annual Grammy Awards-ah ‘Proud Mary’ an perform dun a, 2006-a Kenedy Center-in Tina Turner chawimawina hun an hmanah pawh Beyonce hian ‘Proud Mary’ hi Tina style ngei maiin hmuhnawm leh bengtitlai zetin a lo perform tawh bawk.
‘Tina Turner awm lo kei hi he stage-ah hian ka awm lo ang’- Beyonce
![](https://theaizawlpost.org/wp-content/uploads/2023/05/turner.jpg)