Daily Newspaper

TIPM-ten CM leh midangte kawm

7

Assam sawrkar awpna hnuaia awm, 180 square miles chhunga cheng Zohnahthlakte intelkhawmna Thangram Indigenous People’s Movement (TIPM) chuan Mizoram chief minister bakah sawrkar hotu dangte leh political party aiawhte an kawm.

December 2-a chief minister Zoramthanga nen an inkawmnaah TIPM hruaitute chuan, kum 300 chuang Thangram hmunah hian Zohnahthlak hnam peng hrang hrang 25000 – 30000 vel an chen thu leh Assam sawrkarin nasa taka an rahbeh dan te, electoral roll-ah pawh Assam sawrkarin a thun duh loh dante, anmahni huan lo ram ngeiah pawh duh anga hna an thawh theih loh thute, Assam sawrkarin phutlet an neih zel dante thlenin, power supply pawh an la pek mumal loh dante, sawrkar hnalak thlenga an enhran dan leh hmuhsitna an tawh dante an thlen a ni.

Chief minister chuan Thangram mipuiten Mizoram sawrkar hnuaia awm an duh leh Mizorama beh an duh avanga Aizawl an lo thleng chu lawmawm a tih thu leh sawrkar ang pawha an lo lawm thu sawiin, “Kan thinlungah inzawmna kan neih zel a, inzawmkhawmna tura tan a pawimawh em em a ni,” a ti. Hun remchang hmasa berah cultural exchange neih a tul tih a lo hrilh a ni.

Thangram mipuiten buaina leh harsatnate, ei leh bar thlenga harsatna an tawk chu a tul anga Mizoram sawrkarin tanpui leh buaipui a inhuam thute, Assam lamin an hmangaih lohna chu Zofate inunauna tinghettua hmang a, Zofate insuihkhawmna kawnga Pathian remruata ngai turin Zoramthanga hian a chah a ni.

TIPM hruaitute hian Rajya Sabha MP K. Vanlalvena, Home minister Lalchamliana leh Assembly speaker Lalrinliana Sailo te pawh an kawm a. Peoples’ Conference party hruaitute nen an inkawm bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy