Tlabungah Vehicle Terminal din
SEDP sum cheng nuai 270 senga Tlabunga din Commercial Vehicle Terminal building chu Nilaini khan Transport minister TJ Lalnuntluanga chuan a hawng.
Mizoram khaw pawimawh leh kawtchhuah hmasa Tlabunga Commercial Vehicle building din chu Tlabung leh a chhehvel economy tih hmasawnna kawnga hmanraw pawimawh tak a la nih a beisei tih minister hian a sawi a. Transport department hmalaknain sawrkarin lui hmanga transport kalpui theih dan tur ‘Inland Water Transport Project’ liantham tak a ruahman mek tih sawiin, “Sawrkar laipui kaltlangin Khawthlangtuipui Transport Project atan cheng vaibelchhe 22.90 sanction tawh a ni a, tender tih fel tep a ni. He project kaltlang hian hmasawnna leh employment tam tak hmuh a ni dawn a ni,” a ti.
Hei bakah hian Tuichawng, Darzo to Chhimtuipuiah techno feasibility survey zawhfel tawh niin, Mizoram hmun hrang hrangah inland water transport hi liantham taka kalpui tum a ni tih a sawi bawk.
Tlabung leh a chhehvel khuate sawrkarin a ngaipawimawh nia sawiin, sawrkar hmalaknaa hmasawnna thleng mek leh ruahmanna awmte chhawr tangkaia hmasawnna tlo leh daihrei nei theia hma la turin mipui a chah. “Kan state a la naupan ngaihtuahin hmasawnna liantham tam tak kan nei tawh a, thangtharte pawh a eng zawnga thil thlir thiam tura kan kaihhruai a pawimawh takzet,” a ti.
West Tuipui bialtu MLA Nihar Kanti Chakma leh Transport principal secretary KT Beicho te pawhin thu an sawi a ni.
Tlabungah Vehicle Terminal din
