Tlanchhiat tumte’n Mizoram pan thei lo
Bangladesh-a Chittagong Hill Tracts atanga Mizorama tlanchhiat tum mi engemaw zat chu Mizoram pan ngam lovin an awm a, remchang hmasaa Mizoram pana chhuak thei tura inring sain mi engemaw zat an awm tih thu dawn a ni.
Chittagong Hill Tracts atang hian mi 500 vel chu Mizoramah an raltlan tawh a, ramri-ah BSF an duty avangin Mizoram hi an pan thei ta lo.
Nikum kum tawp lamah mi engemaw zat Mizoramah an tlanchhia a, chumi hnuah BSF an duty tak avangin an tlanchhe hlei thei ta lo. BSF te helin mi 100 vel chu a rukin kuminah an raltlan tawh.
Chittagong Hill Tracts-a Zo hnahthlakte hian Mizorama tlanchhiat hi an duh reng a, a tum pawh an tum reng. Mahse ramri-a duty BSF te’n mi engemaw zat an lo kirtir tawh a, an kirna lamah kawng lakah pakhat a boral tawh. BSF te hel leh an hmuh loh tura kal a ngaih avangin kawng pangngaia kal a theih loh a, an thang rei avangin an eitur paiin a daih lo thin bawk. Changel an rin chang te pawh a awm. Chutiang karah chuan Mizoram hi an pan tha ngam lo a, chuvang chuan tlanchhiat tumte pawh inring sa rengin, chhuak ngam si lovin an awm tih thu dawn a ni.
Thu dawn danin, tlanchhe duh hi an thahnem a, vai vaia chhuah chi a ni si lo a, hming pawtin Mizorama chhuak tur an inthlang thin. Chutianga pawh tawh, Mizorama tlanchhe tur, chhuak thei si lo chu mi engemaw zat an awm.
Mizoram pan tura an pankhawm thin Thingdawlte-ah pawh Mizoram pan tura pawh tawh, chhungkaw 150 vel an awm mek tih thu dawn a ni.
Chittagong Hill Tracts hi an ralmuang lo hle a, sorkar sipaite leh Chin-Kuki National Front sipaite an la inkap deuh reng a, khaw chhunga inkah chang te pawh a awm tih thu dawn a ni.
Tlanchhiat tumte’n Mizoram pan thei lo
![](https://theaizawlpost.org/wp-content/uploads/tap_logo-min-large.jpg)