Mingma Gyaljen Sherpa, kum 37, Bheding, Gaurishankar, Dolakha a cheng chuan khawvela tlang sang zual, metre 8,000 chin a sang awm zawng zawng, tlang 14 a lawn chhuak ta vek a, Guinness World Record a siam.
Dorje Sherpa le Rinzin Doma Sherpa te fapa, Mingma hian kum naupang têin khawvel tlang sang, meter 8,000 chin awm zawng zawng hi a chhip a thleng (summit) ta vek a, hun pawh a hmang rei lo khawp mai.
A record tlang lawn zinkawng hi 2022 khan Manaslu lawn chhuakin bul a tan a, chumi hnuah Sagarmatha, Lhotse, Nanga Parbat, Gasherbrum I, Gasherbrum II, Broad Peak, K2, Dhaulagiri leh Cho Oyu te lawn chhuak lehin, heng tlang zawng zawng hi nikum October khan a lawn chhuak vek hman tawh. 2024-ah Mingma hian Annapurna, Makalu, Kanchenjunga leh Shishapangma te lawn chhuak leh vekin, record a siam ta a ni.
Mingma hi a pa pawh tlang lawnmi tho niin, tlanglawn te kaihruai thintu a ni a, vurseh (frostbite) avanga a kut tan a ngaih hnuah a chawlhsan, a pa hian kum 64 mi niin a thihsan tawh a ni. A farnu- Nima Dangu, Chiring Nanga leh Dawa Phuti Serpa te pawh tlang lawn thei tak tak vek an ni.
Tuna chuan Mingma hian khawmualpui pasarih a tlang sang ber theuh lawn chhuah a tum leh dawn a ni.
Tlang sang zual lawn chhuakin record siam
