Hlu em em, a hlutzia leh a hlut dan pawh sawi hlawh tak ni si, mahse a hlutna ang aia tlawhtu nei tlem em pahnih a awm a, chungte chu Library leh Museum hi an ni, a tih theih awm e.
Nimina Lunglei District Library-a National Library Day puala hun hman a nih thu sawrkar thuchhuaha report-ah chuan, Library din kum 1975 te, tun dinhmunah lehkhabu 25,000 chuang awm thu te, member 1500 an awm thu te tarlan a nih laiin, ni tina tlawhtu zat erawh tarlan a ni lo a. Tlawh hlawh deuh chu ni se, tlawhtu zat tarlan hmaih phal tur chi niin a lang lo.
State Central Library-ah pawh hian lehkhabu nuai chuang a awm a, mahse ni tina tlawhtu an thahnem ngai lo va, hetiang ve riang ruang library changtlung tak ni si, tlawhtu nei mang lova a awm reng mai hi thil mak tak a ni, kan ti a ni maithei. Chutih rualin, lehkhabu ngaina tura fuih thintu sawrkar(te) chuan Library tihchang-tlunna tura dan tha tak a siam “The Mizoram Public Libraries Act, 1993” chu tun thleng hian a la implement duh chuang miah lo. Compensation hnam tih te kha sawrkar hotuten an sawi ri thin a, a hnam ang zawnga sawi kaina turah chuan ‘lehkhabu ngaina lo hnam’ tih hi kan inhmeh ta ber zawk awm e.
Museum hlutna hi hnamdang hian an hria. Sawrkar laipui atanga lal deuh deuh lokal te reng reng, Museum tlawh lova let leh ta hi an awm mang lovang. Nimin maiah pawh Union Minister of State for External Affairs & Culture Pi Meenakshi Lekhi chuan Museum a tlawh nghal chat mai kha.
Museum enkawltute pawhin an sawi thin; zirlai naupangte bak hi a tualchhung mite atangin museum tlawhtu an awm mang lo an ti. Chumi awmzia chu mahni hnam ziarang ngaihven a, ngaihlu a, hriatchian tuma chik peih hi kan awm mang lo tihna a ni. A mipui mimir tam zawk hi chuan khawchhak lam ziarang hi kan hnam ziarang aiin kan hre bel tawh zawk hialin a rinawm rum rum tawh a. He lamah hian, kil tin atanga tanlak kan ngai ta hle niin a lang.
Tlawh hlawh lo – Library leh Museum
