Tlawm taka hmunphiah hralhtute mangang

Zoram hmun danga mite ang bawkin Tlabung leh a chhehvela hmunphiah thartute’n a hralhnaah harsatna an tawk mek a, an eizawnnaah an chet chhiat avangin an mangang hle.
Tlabung, Vairengte leh hmun danga hmunphiah thartute’n sorkarin hmunphiah man (rate) tur a bituk vanga harsat hi tawkah an inngai a, kum 10 chuang man man taka hmunphiah an hralh hnuah kuminah harsatna hi an tawk a ni.
Tlabungah chuan kumin hian hmunphiah ro Kg-ah Rs 70-in an hralh a, kar hmasa khan Rs 65-ah a tla. Nikumah chuan kg-ah Rs 120-140 te’n an hralh a, kuminah a tlawm ta duai a ni.
Kuminah a tlawm a, Zodin Cooperative Farmers Society te’n a leitu mazon-te biain hmunphiah ro hi kg-ah Rs 70 tala lei turin an ti a, chutianga lei thei lote chu transit pass an pek theih loh tur thu an hrilh. Rs 70 chuan an mazon te’n an lei ta a, mahse tun hnaiah Rs 65-ah a tla leh.
Zodin Cooperative Farming Society te sawi danin, sorkarin hmunphiah lei duhte zalen taka an kal a phal leh tak avangin an inrawlh thei ta lo a, chumi hnu chuan mazon-te’n hmunphiah neitute hi hralh lo thei lo dinhmunah an ding tawh tih hriain man tlawm zawkin an dawr ta a ni.
Zodin Cooperative Farming Society hruaitu pakhat chuan hmunphiah thartu hmun thuma thena hmun hnih vel chu ngaiawh pha tura beisei an ni tia an chhut thu a sawi a, kuminah hmunphiah thartute an hlawk lo tak zet a, chawi belh an awm nual dawn niin a sawi.
Vairengte-ah chuan hmunphiah hi a hring kg-ah Rs 15-in an hralh a, hei hi hmunphiah kek tura an sum sen zat chiah a ni.
An sawi danin, hmunphiah sat tur leh kek turin mi an ruai thin a, Kg-ah Rs 12-in an ruai thin. Kuminah Rs 15-ah a pung ta a, Rs 15-a an hralh leh hian a sah leh kehna bika an sen zat an hmu chiah. Tha leh sum senso dang chhut tel chuan Rs 15-a hralh hian an hloh.
“Hralh lo thei lo dinhmunah kan ding a, mazon-te hian chu chu an hria a, an duh dan danin rate hi an rawn siam a ni,” Vairengte-a hmunphiah thartu pakhat chuan a ti a, “Kumin chu kan ropui lo khawp mai. Kan ei tur kan ngaihtuah hle a ngai dawn a ni,” a ti bawk.