Daily Newspaper

Tlawm zawn chunga bul tan PSG!

8

Karliamta Ningania Ligue 1 season thar bul an tanna inkhelah Champions League final khelh vanga league bul tan tlai Paris Saint Germain chu sikhat faiin kaithar Lens lakah an mualpho tawh a, Pathianni zanah an khelmual hman thiam Parc des Princes-a fans 5,000 vel tawiawmtu nei chungin an mikhual Olympique de Marseille lakah 1-0 bawkin an tl^wm leh a, kum 36 chhunga league match hmasa vawihniha an tlawm zawn vawikhatna niin, hetiang hun an tawnbuak hnuhnunber tum khan 13-na ni chungin season an khar nghe nghe.

League bultanna inkhel hmasa vawihniha goal thun loa an chak loh zawn hnuhnunber chu kum 40 chuang kal ta kum 1978 daih tawh kha niin, kumin chutiang result chhia chiah chu an tawngbaw leh ta a ni.

Ni 21 kalta mai Champions League final-ah khan 1-0-in an lo tlawm tawh a, league season thar bul an tanna inkhel hmasa pahnihah 1-0 ve vein an tlawm nawn leh a, Thomas Tuchel-a team hi an game khelh hnuhnung vawithumah sikhat faiin an tlawm fai vek a ni!

Pathianni Parc des Princes inkhelah khan record chhe zet kan hmu tel a, hun tawp dawnah intihbuiana thlengin, hun puma card an phawrh zat kha 17 tehreng a ni a, kum zabi 21-na chhunga Ligue 1 game khata card an phawrh hnember tum a la ni!

Hun pekbelh an tan fel hlawt tihah ‘drama’ a intan a, Marseille player Dario Benedetto chuan PSG player Leandro Paredes-a hnung chu na vak loin a va tawk fuh a, PSG midfielder hian leiah a hnek tlu ta mai! Chumi hnuah Alvaro Gonzalez a tauh zui leh niin a lang!

Buaina lian zawk a chhuak zui! Home substitute Layvin Kurzawa leh mikhual player Jordan Amavi chu inhnekin an inpet awrh ^wrh!

Benedetto, Paredes, Kurzawa leh Amavi-te hi hnawhchhuah an ni phawt a, referee-in video assistant referee (VAR) replay a enfiah hnuah Neymar chuan Alvaro kut a lo thlak ngei tih manchhuah niin, a hm^a yellow card hmanga zilh lo tawk tawh Brazil forward pawh hi straight red card hmanga hnawhchhuah a ni ve leh a, injury time-a hnawhchhuah player panga zinga pakhat Neymar tan tun hi Paris club a zawm hnua red card vawithum a hmuhna a ni tawh.

PSG Brazil forward hian khelmual a chhuahsan pahin fourth official hnenah chi inthliarna lam hawia auhnawmnah a nih thu a hrilh.

Neymar-a chhuah chhan Alvaro pawh hi first half lama inbakkaihna lamah a lo inrawlh tawh a, Angel di Maria chu chil chhak khumah a puh a; Di Maria hi Neymar telin season thar tan hm^a coronavirus kai PSG player pasarih zinga pakhat a ni nghe nghe.

Andre Villas-Boas hoa fehchhuak Marseille-in French champion an hnehna goal awmchhun hi first half minute 31-a Florian Thauvin-a tihluh niin, kum 1984-85 season hnu lama a vawikhatna atan an league game hmasa pahnihah PSG an tlawm leh ta chiah a ni.

Pathianni zan hma lamah Marseille-in PSG an hneh hnuhnunber chu kum 2011 daih tawh kha niin, kha Le Classique-a team inhal pahnih inkhel kha French football-a game sawihlawh berte zinga pakhat a tling hial a ni.

Thauvin-a’n hai set sawt atanga Dimitri Payet-a free-kick ball chhuak goal-a a chantir bakah khan goal hnih dang lut lai pawh hmuh tur a awm a, mahse, Di Maria leh Benedetto goal thun chu offside vanga hnawl a ni.

Inkhelh banah Neymar chuan social media kaltlangin kha buaina chung-chang kha a sawichhuak a, Marseille Spanish defender Alvaro Gonzalez hmaia a hnek lo kha a inchhir tih a sawi. A red card hmuh chhan kha tukhum lama va ben zeuh deuh mai chauh kha a ni ve lah tak bawk a!

Gonzalez pawhin social media lamah Neymar-a’n vunrawng vanga hmusita a puhna chu phain, racism tan amah leh football-a hmun a awm loh thu a sawi.

Inkhelh ban news conference lamah Marseille manager Villas-Boas pawhin football-a racism-in hmun a chan loh thu leh chu chu a player leh Neymar buaina nia a hriat loh thu a sawi vaw chiah bawk.

PSG sports director Leonardo chuan card phawrh kawnga kut zum lo tak referee kha sawiselin, “Khati zat yellow card leh red card phawrh ngai kha chu game a thunun zo lo tihna a ni a, Brisard kha a lu a hai a ni. League Cup final chu a lo ham ve tawh a, khatiang fixture kha chu a la tawng ngai lo a ni,” a ti.

Brazil tana world cup trophy hawn tawh Leonardo hian an team pawh demin, an rilru an hloh chhiava niin a sawi a, inbeihna thleng kha a ngaih serious thu leh chhungkaw lama an inchinfel tur thu a sawi a, an player-te pawh an biak tur thu a tarlang tel.

PSG German manager Thomas Tuchel chuan a thil hmuh kha a duh zawng a nih loh thu sawiin, intihbuaina chhuaka a player-te chet dan kha a sawisel a, “Ka thin chu a rim lo a, mahse, hun tawp hma minute thum chhunga kan chet dan kha chu ka pawm zawng a ni lo a, kan ti mah mah a ni,” a ti.

Paris Saint-Germain head coach Tuchel an result-ah lawm lo mah se a naute khelh dan erawh a fak a, khatiang zela an khelh chuan an la chak leh ngei tur thu a sawilang tel.

Kylian Mbappe leh Mauro Icardi tel loa an chak zawh loh hnuah Tuchel hi transfer a kalpui dan tur an zawt a, Thiago Silva leh Edinson Cavani chhuah hnua team thuamchak an tum thu leh player thar an sengluh ngei a beisei thu a sawi.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy