Daily Newspaper

TLAWMNGAIHNA PAR A VUL

36

-B. Lalthangliana

Pi pute hun atanga khawtlang leh nunhona tinuama phuar khawmtu ‘Tlawmngaihna’ hi zirna kan uar vang te, sum leh pai <ma kan tlan nasat vang leh hmasawn kan tum luat vang tein mi thenkhat chuan chuai ta riai riai hialin an sawi thin a. A dikna chin pawh a awm mai thei a. Mahse tunlaia kan zing thil thleng vang hian a dik chiah lo tih kan hmu a ni.

Khawvel indopui 2-na a thlen khan, British Empire hnuaia awm kan nih avangin Mizote pawh a tul tul thawk turin an phut ve a, Mizoram khaw hrang hrang atangin Mizo tlangval 2,100 lai chu kum 1917 April khan an thawk chhuak a. An la hniam hle a, ziak leh chhiar thiam chu tlem t> chauh an ni a, lu an la met lo a, pheikhawk an bun hek lo a, Silchar takngial pawh la thleng ngai lo an ni hlawm.

France rama an hna thawh hrang hrang chu sawi tur tam mah se tun tumah chuan pakhat chauh sawi ila. Chaw ei tura chaw an dawhnaah Mizo tlangval rual chuan an inchuh buai ve ngai hauh lo a, hnam dangte erawh chuan hmasak duhin an inchuh buai thin a. Chaw semtute chuan mak an ti hle a, an hre thiam thuai a. Chaw semtute chuan a bikin chaw dawhna tur counter bik Mizote tan an siamsak ta hial a. An rinawm a, an taimak leh tlawm an ngaih em avangin fak an hlawh hle a ni.

Covid 19-in khawvel leh India ram a tuam a, Mizote pawh min hrut ve a, a ziaawm pawl kan ni awm e. Mahni ram panin mi tam tak an haw dul dul a, Mizote kan bang bik lo. Chung zinga Mizo za tel teh meuh Bangalore atanga haw turte Rail-ah lut tur chu fel takin an intlar a, luh hmasak inchuhin tumah an innek buai ve lo. Chu laia duty Police officer pakhat chuan, “Hemite hi an va mak ve, hetiang hi ka la hmu ngai hauh lo,” a tihial!

Ka thianpa Pu Vanlalzawma chuan MP(LS) a nih laia a hriat, kan inkawmnaa a titiah, ‘India President dinner-ah meuh pawh MP rualte chu hmasak kan inchuh tho,” a ti a. “Enga tinge” tia ka zawh chuan, “An culture a ni miau a,” a tithung.

Mizo tlangval rual 2100 laiin tun hma kum 100 chuanga France rama Mizo Culture an nunpui kha vawiinah pawh Vai rama Mizo nula leh tlangval za rualin tuma tirh leh hrilh ngai loin an nunpui a, an hmang kha an fakawm a, an chhuanawm takmeuh a ni.

Tlawmngaihna hi Mizoram pana haw dawnah chauh a ni lo, ramri-ah leh khawchhunga duty-naah te, chhiat rupna thlen hunah te, mi reithei zual in sak that kawngah te, dam loh vanga thlawhhma la hlei thei lo khaichhuah tumah te, mi bo leh tui tla zawn kawngah te leh kawng dang dangah te a par chhuak zel thin.

Khua a thim zet loh chuan thla >ng hlutzia a lang lo a, mi kawlh sa kawl hm^ah lo chuan Pasalthate huaisenzia a lang bawk lo a, khawpui hungna kulh a ngheh leh ngheh loh chu hmelmaten an beih zet loh chuann a lang hek lo a, a hriat theih loh ang bawk hian harsatna lian tham leh chhiat rupna hunah meuh chuan ‘Tlawmngaihna Par’ a lo vul leh thin a ni.

Manganna tak tak tawh tuma hawna tur ‘Ka Ram’ tih tur neih vanneih thlakzia leh hlutzia he hripui leng vang hian Mizote kan chiang lehzual ngei ang. Hei hi hnam upa leh changkang Mingote hian an hre chiang hle a. Falam doctor hmingthang tak Dr. Nikhuaia nupui chu Mingo a ni a, Burma-ah kum rei deuh tak awmin fa a nei nual tawh naa Burma Citizen a la duh chuang lo a. Mandalay University-a Botany Professor Dr. Than Tun-a nupui pawh Mingo tho a ni a, kum rei tak awmin fate nei nual tawh mah se Burma Citizen a la duh chuang bawk lo a. Hengte hian harsatna tawp khawk a thlen hunah neuh chuan mahni ram hlutziaah an chiang hle a, an ngaihtuah thui hle a tih theih a.

Kei tehlul pawh hi Mizoram pawnah kum 30 chuang awmin zirnaah sei lian ka ni a. Min tuai hriamtu Professor Than tun, MA, BL, PhD, DLit(London) chuan History, Literature leh Culture-ah ka tui ve tih a hmu a, hna thawh ka tum ve tih a hre bawk a, “Liana, in ramah haw leh rawh, eng ang pawhin hna thawk mah la, mahni ram leh hnam zingah lo chuan hlawhtlinna tak tak a awm ngai lo,” tia kum 1985-a min fuih kha a dikzia ka fiah deuh deuh a, ‘Ka Ram’ tih tur neih hlutzia hi ka chiang ve khawp mai.

Chuvangin ‘Ka ram’ tih tur ‘Mizoram’ kan nei hi a hlu takmeuh a. Humhalh tlat a pawimawhzia Covid 19 avang hian kan fiah kawk kawk ngei hlawm ang a, kan la chiang deuh deuh dawn bawk a ni.

Aw tlawmngaihna hl<, aw nunna p^r,
Kan tlangram nuam hmun s^ngah hian;
Kum sang tam tak pawh ral mah se,
Zammual liam lovin ding reng rawh.,

lungrual taka tidial dial leh a taka nunpui zel i tum theuh ang u.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy