Zoremi Hmar Zote
Mizo nih hi thil nuam tak zawng a ni ve e. Hman lai kan pi leh pu hun lai ata tawh kan Mizo nuna bet tlat thil, hlû leh mawi em em mai tam tak a awm a. Chu’ng zinga pakhat, a mawi zual ber emaw tih mai tur chu tlâwmngaihna hi a ni âwm e. Hnam dangin an nei ve thlâwt lo emaw, an hmelhriat hauh lo tih bur theih chu a ni lo na a, tlawmngaihna kawnga Mizo ten kan tawn sànzia leh kan ngaih pawimawhzia chu hai rual loh leh phat rual lohin a lang a, kan thisenah hian a luang tel tlat tawh niin a lang.
Chutih laiin kan nun ze mawi zinga a tha zual, aia upa zah te, tlawmngaihna leh ram leh hnam hmangaihna te hi, khawvel changkannain kan bu zawl ngeia min luhkhung tawh vang te leh, in chhung atanga inzirtir kan uar tak loh vang nge, a chhan ber mawhpuh tur awm mumal si lo hian kan dal ta deuh niin a lang ta fo va, hei hian lâi a tinâ a, engtia han chhawm nun leh chi nge tih hi mi tinin kan ngaihtuah a, kan vei a hun ta tak zet mai.
Tlawmngaihna han tih hian sawi fiah dan teh vak a vâng riau a, ‘mahni chan tur dawn lo va midang hamthatna tur ngaihtuah, chan tha zawk chu midang tana khêk’ ti tein sawi ila a teuh deuh berin a rinawm. Mizote hi tlawmngai hnam kan ni a, pi leh pu chena kan hnama bet, kan thisena luang tlat leh kan than hnan thil a ni a, a ropuiin a zahawm a, a thain a hlu hle. Tlawmngaihnaa kan sànzia chu kan thawnthu hrang hrang, kan inhrilh chhawn zel atang te pawh hian a lang a. Zualko kal thu-ah pawh, a tul a nih phawt chuan a thim a vâr, a sûr a sâ thlu lovin intirh chawp ngai miah lova ‘kei ka kal ang e’ ti thei, a chuha inchuh hial thin te kha Mizo tlangvalte an ni a, ruang zàwn inchuha inbuan thial thial thin leh thlan laihnaa lei laih tisâwt lo lek lek khawpa a chhunga luh inchuh thin pawh kan Mizo tlangvalte tho an ni.
Ei leh in thu-ah ni se ‘ka ei chak lo ve’ ti thin hnam kan ni a, kei chu puar lo deuh mah ila mi dang puar rawh se tihna rilru taka kha a Mizo em em a ni. Midang thatna tura mahni indahtha thei, mi dang chan thatna tur a nih phawt chuan mahni inngaihtuah lo thei hnam kan ni thin a, kawng tam takah chuaiin vuai deuh tawhin lang mah se, he tlawmngaihna hi vawiin thleng hian a hunah chuan a la vul mawi a, Zofate hian kan la hmet hlum hmak bik lo tih lanna thil tam tak a lo awm leh thin hi a lawmawm a, a ropuiin vawn reng atan pawh a tha ngawt mai.
Tun laiah chuan:
Petrol la tur kan han i ntlar thap a, intlar laite rawn tlan pèl pur pur mai, an thunsak lai bula va ding chut hmuh tur an awm ziah mai. Hei hi thil mawi a ni lo…mai a ni lo va, kan Mizo tlawmngaihna bawhchhiatna turu tak a ni. Tu pawhin tih tur, kalna hmun tur leh pawimawh kan nei vek; hmanhmawh vek kan ni; a lo intlar sa-te hnungah khan din ve a, kan hun a lo thlen hun nghah ve mai kha mi pangngai nihna chu a ni mai. Hetiang deuh chhiah hian traffic a han jam a, two wheeler takngial pawh kan han ding phei thup a, side lehlam awl lai hmu fuha jam-a ding tlar lai rawn tlan pel pur pur mai, a jam tizual tawk vela lo va ding leh si kan awm thin. Zilh loh fa hi kan ang thin hi ka tia lawm maw aw! Hmanah chuan maw, “Nangin ti hmasa rawh, kei chu ka hmanhmawh lo ve,” an ti thin; chu chu Mizote tih dan a ni. Ei leh in chungchangah pawh ‘upa berin a bàr hma chuan, naupangin an bar khalh ngai lo’ tih te kha a hman lai deuh ta ruih maiin a hriat a, han chhawm nun that leh atan a tha ngawt mai.
ATM-ah kan han intlar a, lo thleng chauh si, a kawngka bula phei nghal ringawt pawh kan awm fo. A mawi lo mai pawh a ni lo, a thinin a thing! Thil pawimawh eng emaw-ah, a indawta thil tih ngai, intlar hial a ngaihna hmuna chuhhelh hi a Mizo lo va, vai chhe tih awm tawk lek a ni tih hi hre thar leh ang u. Intlar ve mai ila, kan hun a thlen chuan kan ti ve mai dawn alawm. Mizote hi chuhhelh hnam kan ni ngai reng reng lo tih hi hriat a va pawimawh em. In chhungah nu leh pa, pi leh pu ten kan tu leh fate kan hrilh that a hun ta viau mai.
Tun maiah khuarel chhiatna hrang hrang lo thlengin lei minin in eng emaw zat a hnâwl a, nunna chân pawh tam tak an awm tih kan hre theuh a, ruah sur leh khaw vawt pawisa lova ruang zawn leh chhanchhuah tur zawnga thawk chhuakte an va fakawm em! Hei pawh hi tlawmngaihna a ni. Kan nuna bet tlat tih takah a la chuai lo va, a la vul reng tih han hriat hian a nuam a, thla a muang a ni. Chhiat tawkte kan tawrhpui tak zet a, an tan i tawngtai teh ang u.