Tlawng lei dawh mek kan uluk avangin dawh hram hram ang – PWD minister

Tlawng lei dawh mek kan uluk
avangin dawh hram hram ang
– PWD minister
Tlawng lei dawh mek chu uluk leh fimkhur taka hna thawh a nih avangin, thil tha zawk a chhuah theih beisei vangin mipuiin dawh hram hram turin a ngen nawn tih PWD minister Vanlalhlana chuan a sawi.
Inrinni khan PWD minister hian Tlawng lei dawh mek hi a tlawh a, hnathawktu leh PWD hotute nen chak zawka hna thawh dan tur leh mipui tana harsatna awmte sutkian dan tur an sawiho. Tlawng lei remkhawm mek chu hlawhtling taka dawh a nih thuai theihnan uluk takin tih chhin ‘trial launch’ neih tan a ni.
Mizoramah lei kan neih tawhte chu upa tawh tak tak, a tam zawk chu suspension bridge leh Bailey bridge an ni tih minister hian sawiin, tunah lei thar dangdai tak mai kan nei tur chu a lawmawm a, mipuiin tangkai taka kan chhawr a beisei tih a sawi.
“Mizorama kan lei te hi a tlo lo hle thin a, a chim fo mai a, tuna kan lei dawh mek hi chu fimkhur tak leh uluk taka dawh a ni a, a thawh chhung pawh a rei lo thei lo a ni. He lei dawh hna hi 2021 March 7 khan tan a ni a, thawh zawh hun tura bituk chu 2023 October 22 a ni a, an zawh hman loh avangin ni 209 pawhsei a ni. Uluk leh fimkhur taka hna thawh a nih theihnan leh a rang thei ang bera dawh zawh a nih theihnan road block kan siam a, hei hian harsatna a siam lo thei lo. Amaherawhchu thil tha zawk a lo chhuah theih kan beisei vanga ni a, mipui pawhin dawh hram hram turin ka ngen nawn a ni,” a ti.
Tuna lei dawh mek chu Mizoram tan a pawimawh a, Mizoram khawpui leh khawthlang lam inthunzawmna kawng pawimawh tak a nih avangin leh kan airport neihchhun kawng a nih avangin pawl hrang hrangin ngaipawimawhin a hmunah an tlawh thin chu lawmawm a tih thu Vanlalhlana hian a sawi. “Kei ngei pawhin vawi li ka tlawh tawh a, thawktute hna tha tak leh chak zawka thawk turin ka chah fo thin. Thawktuten theihtawp an chhuah thu leh mipui dawhtheihna avangin lawmthu an lo sawi ve fo a ni. He lei hi ram rohlu tling tur a nih avangin a enkawl zuina lamah mipuiin duat taka kan enkawl a ngai dawn a ni,” a ti bawk.
ZPM sawrkar hnuaiah chuan eng hna pawh nise a tha tur a ni, an tih thin thu a sawi a. Company hna a ni emaw mimal leh contractor hna emaw pawh nise, State Monitoring Committee-in uluk takin an thawh lai leh an thawh zawh hnu thleng pawhin a theih chin chinah an vil reng dawn tih sawiin, hemi kawngah pawh hian sawrkar chuan mipui thawhpuina a mamawh reng dawn tih a sawi. “Tunlaiah social media a chak tawh a, heng hmangte hian sawrkar hnenah kan khawtlang leh a chhevela hnathawh tha leh tha lo kan hrilhhre zung zung thei a ni,” PWD minister hian a ti.
PWD hotute sawi danin, Tlawng lei thar tur hi ton 450 vela rit, metre 90-a thui a ni. Lei hi ‘Network Inclined Arch Bridge’ a ni a, Poddar Infratech Pvt. Ltd. Delhi-in a thawk a ni. Project kalpuina atan hian Ministry of Road Transport & Highways atangin cheng vaibelchhe 36.99 ruahman a ni. Lei thar hlanfel a nih hunah kawng hi lei hlui lam lirthei zawh theiha hawn theih beisei a ni tih thawktute chuan an sawi.