Tlawng then fai tumtute’n hma sawn hlei thei lo

Tlawng lui then fai an tum a, he lui thian tur hian a fintu lui leh Aizawl khawpuia kawr hrang hrang atanga tan a ngai an tih avangin Tlawng-a luang lut kawr an hma hmasa. Mahse hma an sawn hlei thei lo, kawr-ah an la tang.
Aizawl veng thenkhata lui kawr, Tlawng luia luang lutte an thian a, heng kawr hi a lo tawp em mai a, Rih artui phur ang deuhin sukna ngaiah an su tluk tluk mai. Tlawng an la hlat hle.
“Save the Riparian” tih hming invuahin mi thahnemngaite’n Tlawng lui then fai an tum a, he lui fintu lui leh kawr hrang hrang then phawt ni se tiin March ni 26 khan an tan ta a ni. Ni 20 chhunga Tlawng lui thlen hman an tum a, a ni 15-na Inrinni khan Aizawl chhungah an la awm!
“Bawlhhlawh a tam lutuk, rin phak bak a ni. Awmhmun kan sawn thei lo a ni ber mai,” frontline leader Rom-a Hmar chuan a ti.
A hmuna thawkte sawi danin, naute diaper a tam a, a tam ber hial mai thei; hmeichhiain an thla tin bi a chhuah changa an hman thin, hman hlui a tam a, cement ip ruak leh silpaulin a tam bawk.
Thil dang pawh a tam; blanket chhia leh rizai chhia te, carpet chhia te a tam a, khawl thil pawh a tam an ti.
Ni 15 an thawh tawh chhungin bawlhhlawh hi pickup trip 30 vel an chhar khawm tawh. Lui kawr thian an ni a, motor a thleng si lo, kawngpui thlengin an thiar leh a, bawlhhlawh a lo tam bawk nen, an hna a chak thei lo.
Hnatlanpui an awm thin a, a bul hnai veng thalaite’n an puih chang a awm, adventure club te’na an puih chang a awm, sikul-a eco club te’n an puih chang a awm bawk. An tam ber ni chuan 50 an tling.
‘Hman atanga bawlhhlawh kan lo paih duhdah tawh kha a ni a, a tam khawp mai,’ an ti a, leivung paih a awm bawk a, leivung kara bawlhhlawh, leivung nena inchar nghet tawh te then fai tuma an beih chiam a ngai thin.
Tuna an thlen china an thil hmuh pakhat chu, lui kawra septic tank luan luhtir an lo awm teuh tih a ni. A khur pawh nei lova comode atanga lui kawra luhtir an awm a, a khur atanga lui kawra luhtir an awm bawk. He an thil hmuhchhuah vang hian AMC-in ‘order’ an chhuah nghal a, tun thla chhunga titawp vek turin an ti. He an thil hmuhchhuah vang hian veng thenkhat chuan an vengah chutianga ti chu an awm ve em tih lo inen an awm bawk.
An rin phak baka bawlhhlawh a lo tam avang hian Tlawng thlen tum rih loh mai an rilruk a, Aizawl khawpui chhunga lui kawr hrang hrang then fai tum law law phawt mai te pawh an rilruk mek.