Tluangi leh Rinpuii telna India team chak
India Junior Women’s Team-te’n Australia tour an kalpui mekah nimin, Thawhtanni khan an match thumna khelin, Australia Junior team lakah India nulate hi sikhat faiin an chak.
He match hmuh nawm tak, National Hockey Centre, Camberra-a khelhah hian first half chhungin khawi lam mah mahin goal an khung thei lo va. Second half tan atanga minute hnihnah Kanika Siwach (Indian forward) chuan he match-ah goal awm chhun leh India chakna goal hi a rawn thun ta a ni.
He tour-a an match hmasa bera India tana goal khungtu Lalthantluangi (Kanghmun South) leh PC Lalrinpuii (Hnahthial)-te telna India junior team hian match hnih dang khelh tur an la nei a; vawiin, September ni 30 leh October ni 2, Ningani hian Australia Hockey One Leaque club Canberra Chill an infiampui leh ang.
Kan hriat tel atan an hmachhawn turte hi senior team an ni a, an chak emaw chak lo emaw India tleirawlte tan hlawkna a awm ngei tura beisei a ni.
India hian he tour-a an match khatna hi kar hmasa Zirtawpni khan an khel a, 2-3 uiawm takin an chak lo.
He match-ah hian goal awm loa first quarter a zawh hnuah Australia lamin 2nd quarter minute 36-na leh 45-naah goal an thun.
Si hnih fai thaha an hnufual hnuah India lamin tan rawn la thar ve lehin, 3rd quarter minute 54-naah Mizo tleirawl Lalthantluangi chuan India si phurh pakhat zawk a rawn sut then a, chumi hnu minute 54-naah Sonam chuan India tan a rawn thu ve leh.
2-2 hi an tawp hlenna tur ni thei tawh mai dawna a lan hnu hun tawp hma minute khat chauh a awm tawh tihin Australia lam hian chakna goal chu an rawn thun leh ta tlat a ni!
An match hnihnaah India hi an khel fuh lo hle a, 5-0 teh meuhin an tlawm a; niminah ropui takin an rawn come back ta a ni.
Tluangi leh Rinpuii telna India team chak
