Social Justice & Empowerment department hnuaia scheme hrang hrang social audit chungchangah Kolasib district bawrhsap John LT Sanga hoin nimin khan thutkhawm a ni a. Aizawl atangin Social Audit Unit director Laltleipuii’n a telpui.
Tun tumah hian TNT Kalvary Home, Khuangpuilam Kolasib-ah social audit an nei a. TNT-ah hian National Action Plan for Drugs Demand Reduction hnuaiah Integrated Rehabilitation Centre for Addicts bakah National Action Plan for Senior Citizen kalpui a ni.
Thutkhawmah hian heng scheme hnuaia TNT-a hmalakna hrang hrang sawi a ni a. TNT-in fund a dawn dan sawi niin, 2023- 2024 ah fund dawn a la awm loa, NAPSC bikah phei chuan 2021 hnulamah fund dawn a awm tawh ngai lo tih sawi a ni. IRCA hnuaiah ruihhlo ngai enkawlna tur mi 15 leng siam a ni tih a sawi a ni bawk.
Social audit-ah hian TNT hian kawng tam takah guideline anga thil a kalpui tih sawi a nih rualin, scheme atanga fund an dawnte hi inenkawlna tur chauh a nih avangin infrastructure lamah state sawrkarin hma laksak thei se tih rawtna siam a ni.
SAU hnuaia thawktute bakah Jordan Centre Sethawna thawktute, MHIP leh MUP aiawhte an tel a. MHIP-in a enkawl Swadhar Greh-ah kum hnih chhung fund dawn a nih tawh loh thu, Family Counselling & Guidance-ah kum khat vel fund dawn a nih tawh loh thu pawh sawi a ni.
TNT-a fund dawn dan enfiah
