TNT dintu hnenah Padma Shri chawimawina

Mizoramah chuan TNT han tih hian inhrilhfiah vak a ngai lo a, Thutak Nunpuitu Team tihna a nih thu te, harsatna tawkte enkawltu an nih thu te hre lo an awm lo ang tih tur khawp a ni. A dintupa Sangthankima’n chawimawina a dawng a, “Pathian vang a ni,” amah chuan a ti.
Sangthankima hian Padma Shri chawimawina a dawng a, Ningani khan Delhi-ah India ram president-in a hlan. He chawimawina a dawn tur thu hi Republic Day-ah khan puan a lo ni tawh.
Amah Sangthankima hian a dawn tur chi a nih leh nih loh a hriatthiam loh avangin a inkhap a inkhap a, Pathian remruat nia a hriat avangin a dawng ta tih a sawi.
“An pek dan ka han en hian ka dawn tur chi niin ka hre lo a. Ka tih chi loh deuh niin ka hria a,” a ti a, pawm tur a ni em tih a hriat loh thu te, a dawng tura Delhi-a kal hi a tih tur a ni em tih te a hriatthiam loh thu sawiin, “Ka kal dawn nge dawn lo tih ka ngaihtuah a…” a ti a, “Pathianin min dawntir a nih hi ka ti ta a ni,” a ti.
“Ka lan ropuina tur ka zawh ang tih ka hlau,” tiin he chawimawina hi a dawn tur a ni em tih a ngaihtuah thu a sawi a, “Pathian ka zawt nasa a. Lalpa min tihsak nia hriatna ka nei ta a,” tiin a pawm tak dan hi a sawi a ni.
India ram president hnen atanga he chawimawina a dawng zo, a thutna lam pana a let leh laiin “Pathian chu fakin awm rawh se,” tia a au thu a sawi.
TNT hi 1988-ah a din a, hmun hrang hrangah centre an nei tawh. An centre hmasa ber chu Aizawla Zuangtui venga Kalvari Hospital hi a ni a, chumi hnuah Kolasib, Lunglei, Champhai leh Myanmar-a Tahan-ahte an din leh a ni.
Centre hrang hranga awm zat hi a danglam deuh reng a, tuna an chhinchhiah dan chuan Aizawla Kalvari Hospital-ah mi 1810 vel, Kolasib-a Kalvari Home-ah mi 350, Lunglei-a Lunglei Home-ah mi 730, Champhai-a MZ Home-ah mi 300 vel, Tahan-a Tahan Home-ah mi 240 vel an enkawl mek. A thawktu lam hi mi 200 vel an ni a, an headquarters Aizawlah hian thawktu mi 92 vel an awm.
Sangthankima hi a hmain Padma Shri chawimawina dawng tura thlan tura chhawp chhuah zingah a lo tel tawh a, mahse “ka thawh chhan a ni lo” tiin a hnar a ni. Tun tumah hian dawng tur hming an puanin an thlang tih hi a hre chawp chauh tih thu dawn a ni.
Thu dawn danin, Republic Day hma lawk khan Delhi atangin award dawng tura thlan a nih thu hrilh an awm a, Hindi-a an biak avangin eng award nge tih pawh an hre lo. Chumi hnuah Padma Shri chawimawina dawng tura thlan a nih thu hi chiang zawkin an hre ta a ni.