Tony Bennett a awm ta lo

Rimawi khawvela arsi lian, Grammy Award pawh 20 dawng tawh, rimawi khawvela kum 70 chuang lo tal tawh Tony Bennett, kum 96, chuan mual a liam ta. Bennett hi New York-a a chenna inah July ni 21 zinglam (keini tan zanlam a ni hman tawh) khan a thi a, a thih chhan hi puan a la ni lo nain 2016 atang khan Alzheimer’s Disease a lo nei tawh a ni. Tony Bennett hi a kum 97-na pianchampha a thlen hma kar hnihah mual a liam ta a ni. Bennett hian a nupui Susan leh a fapa Danny bakah midang laka a fapa Dae leh a fanu te pahnih Antonia leh Joanna te a kalsan a ni.
Tony Bennett hian 2021 khan tour leh live performance a chawlhsan thu a puang a, hemi kum August thla hian a live performance hnuhnung ber neiin, a thian leh a zaipui thin, album te pawh a lo siampui tawh Lady Gaga nen City Music Hall-ah an perform dun a, One Last Time tih hla an sa dun a ni.
Tony Bennerr hian 1950 atangin a rimawi zinkawng a zawh tan a, 2014 thleng khan regular takah recording a la ti thei a, album 60 chuang a tlangzarh a, chung zinga 44 chu Billboard 200 (albums) chart-a lang thei niin, a hla hit ‘I Left My Heart in San Francisco’ tih hla chu chart No.1 te pawh a lo kai tawh a ni. 2011 khan kum 85 mi niin, a album ‘Duets II’ tih chu Billboard 200 chart-ah No.1 a kai pui a, hei hi he chart-a a album No.1 kai thei hmasa ber a ni.
A laiah hming chu Antonio Dominick Benedetto niin, Long Island City, New York-ah August ni 3, 1926 khan a piang a, kum 5 mi a nihin a zai tan tawh. Kum 10 a tlinin a pa-in a thihsan a, a nu chu laphiarin a inhlawh thin a, an chhungkaw khawsak a harsat avangin an sum lakluh tihpun tumin kar khata dollar 15 hlawhin khualbuk-ah te a zai tan ta a ni. Kum 16 a nihin Ditmars Theater-ah usher hna a thawk a, heta thawk chung hian club hrang hrangah zaiin a inhlawh bawk thin.
High School a zawh hnuah sipaiah a tang a, Germany-ah post a ni a, chutah chuan Army band-ah a zai ve thin. Sipai atanga a chhuah hnuah drama, diction leh music theary te American Theatre Wing-ah a zir leh a, 1946 atangin nightclub velah zaiin, a hming lemah Joe Bari tih a hmang ta a ni.
1949-ah Greenwich Village Inn-ah Pearl Bailey show a hawn sak a, hemi tuma a zai hi Bob Hope-a’n lo ngaithla fuhin, Paramount Theatre-a a show-a zai turin a sawm a, mahse, a hming Joe Bari tih chu thlak sakin, Tony Bennett tih hming a lo pu tan ta a ni. Hope nen an inzui lai hian ‘Bpulevard of Broken Dreams’ demo recording a tih chuan COlumbia Records beng a thleng a, anni nen hian hla pali a record a, chung zingah chuan ‘Boulevard’ tih hla pawh telin, April ni 17, 1950-a ‘Boulevard of Broken Dreams’ an tlangzarh chuan kar 10 chhung chart No.1 a kai zui ta a ni.
1951 leh 54 inkarah Bennett hian top 20-a lang thei hla 12 a nei a, chung zingah chuan ‘Beacuse of You,’ ‘Cold, Cold Heart,’ leh ‘Rags to Riches’ (heihi No.1 a kai) leh ‘Stranger in Paradise’ (hei hi chart No.2 a kai) te pawh a tel. 1956-ah chuan Billboard Hot 100 chart-a top 20 kai thei hla 20 kai thei hla pali a nei a, 1957-ah a hla ‘In the Middle of an Island’ chu No.9 a kai bawk.
1961-a a album ‘I Left My Heart in San Francisco’ chu Billboard 200 chart-ah No.5 a kai a, kar 149 chhung chart-ah a lang thei a, a album title track chu Hot 100-ah No.19 a kai bawk. He album hi a rimawi zin kawngah a pawimawhin, a kawng sialtu pawimawh tak a ni ta a, heta tang hian a khat tawkin chart-ah a hla a lang ve ta deuh reng a ni.
2006 khan a kum 80 tlin champha pualin album thar ‘Duets: An American Classic’ a tlangzarh a, he album-ah hian Paul McCartney, Elton John, Barbra Streisand, Bono leh zaithiam dang a thawhpui a, he album hi Billboard 200 chart-ah No.3 kaiin, Tony Bennett album zinga hralh kal ber pawl a ni zui ta bawk. Kum 85 a tlin kum, 2011-ah ‘Duets II’ a tlangzarh leh a, Billboard 200 chart-ah No.1 a kai a, Bennett hi he chart-a No.1 album nei thei upa ber a ni ta a ni. Bennett hian Lady Gaga nen album intawm ‘Love for Sale’ tih leh ‘Cheek to Cheek’ an lo tichhuak tawh bawk a ni.
Bennett hian 2001 khan Grammy Lifetime Achievement Award a dawng a, Grammy Award dang 19 a dawng tawh bawk. 2005-ah Kennedy Center Honors niin, 2006-ah NEA Jazz Master a puan niin, United Nations atangin Citizen of the World Award a dawng bawk