Top seed Swiatek veltu Putintseva

Wimbledon khelh mek women’s singles lamah Inrinni khan top seed Iga Swiatek chuan a khelmual hman thiam loh pawl grass-ah chetchhiat a chhunzawm a, world number 35 Yulia Putintseva lakah 3-6 6-1 6-2-a tlawmin third round a paltlang zo lo a, match 21 a chak zawn mekna a tawpsan ta bawk.
Wimbledon chiah hi Grand Slam tournament zingaIga Swiatek-i’n quarter-final a la pelh zawh lohna awmchhun a ni.
Clay leh hard court lama a hlawhtlin hle hnuah French Open champion Swiatek hian hneh takin WTA Tour a thunun a, mahse, Wimbledon grass hi a ti hlei thei tlat lo!
A thiamna mual Roland Garros lamah Poland tan kan hma lawkah hian Olympic tennis a khel zui dawn a, London grand slam-a a lungngaihna hi gold medal hmangin hliah zo tak ang maw?
Grand slam title panga hawn tling tawh kum 23 mi Pole laka hnehna a chan hnuah Kazakh Putintseva kha Court One mipuiin nasa takin an lawmpui a; a career-ah French Open leh US Open quarter-final thleng ve tawh mah se tunhma lamin Wimbledon second round a la pel ngai lo.
Last 16 lama Latvian 13th seed Jelena Ostapenko hmachhawn zui tur Putintseva chuan world number one laka hnehna chan chu ropui a tih thu hahipin a sawi a, an inkhelh lai atang tawh khan a phur tawh tih a sawi!
Tla langsar dang zingah Tunisian two-time finalist Ons Jabeur a tel a, Ukraine player Elena Svitolina chuan 6-1 7-6 (7-4)-in a hnawtchhuak.
2022 champion Elena Rybakina pawhin Danish wildcard leh world number one hlui ni bawk Caroline Wozniacki chu 6-0 6-1-in a sawp ve bawk.
17th seed Anna Kalinskaya pawhin a chipui Russian Liudmila Samsonova lakah 7-6 (7-4) 6-4 hnehna changin fourth-round lamah Rybakina a hmachhawn ang.
Danielle Collins chu set hmasaberah 4-0-in a hniam hman a, ruah avangin inkhel tihtawp a ni a, an khelh chhunzawm leh hnuah American 11th seed a insiamtha a, Beatriz Haddad Maia of Brazil laka 6-4 6-4 hnehna changin round linaah 31st seed Barbora Krejcikova a tum zui thei dawn.
Hliam avanga Jessica Bouzas Maneiro a inhnuhdawh thuai avangin Czech Krejcikova hian third round match dangah nuamsain hnehna a chang.
Second round lama fifth seed Jessica Pegula lo barakhaih tawhtu Chinese Xinyu Wang bawk khan tan tu ngah British No. 2 Harriett Dart laka 2-6, 7-5, 6-3 hnehna chang lehin Wimbledon Championships ladies’ singles third round a paltlang a; he thu buatsaih lai thleng hian Zirtawpnia fourth round lut Emma Raducanu chiah kha he draw bika British player dam awmchhun a ni tawh a; nizan women’s singles round of 16 inkhel pakhata Raducanu leh Lulu Sun (New Zealand) inkhel result tarlan hman a ni ta lo.