Daily Newspaper

TORTURED FOR CHRIST: THE MOVIE

72

-RE Ralte

Hman deuh tawh khan Kristian magazine pakhatah Kristian film pakhat ‘Tortured for Christ’ tih thehlarna (advertisement) ka hmu zuai a. Rawngbawltu hriat hlawh tak Richard Wurmbrand-a chanchin film an siam a ni tih ka hre nghal a. Ka rilru latu tak erawh chu chumi pheka ama thu sawi an nem kai, “A man really believes not what he recites in his creeds, but only the things he is willing to die for,” chu a ni a. Zotawng chuan, “Patlingin a rin tak tak chu a thihchilh ngam thil hi a ni mai e, thurin sawi chhawn ve satliah lam a ni ber lo,” tihna a ni awm e. A pa rem rem hle mai. Rinna kan hriat thiam dan nen a inmil tak ang maw. Chik taka ngaihtuah a phu tak zet a ni.

A film lo chhuah ka nghakhlel
Tunlai hnaiah hian Kristian film siam an uar ta telh telh a. A tulna leh a tangkaina an hre chhuak zel ni tur a ni. Christian film tha tak tak Risen, Heaven’s for Real, God’s not Dead, The Case for Christ, I Still Believe tih te hi en tlak tak tak an ni a. Chutiang zingah chuan ‘Tortured for Christ’ hi ka lo nghakhlel hle mai. Richard Wurmbrand hi ka hriatna a rei tawh a, naupan laiin a lehkhabu tuna a film hming chiah pawh kha ka lo chhiar tawh nghe nghe. Mahse, zep nak emaw, Kristian tihduhdahna lampang hi chhiar nuam ka tih zawng tak a nih lem loh avangin ka chhiar chhunzawm nasa lo hle mai. Tuna mi erawh hi chu ka nghakhlel tak zet. Rinna chungchang hi a sawifiah ‘pa’ tiah tiah em mai. A nun ngeiin a phur chhuak hneh bawk a.

Rinna awmzia hi
Keini ho zingah hi chuan rinna sawifiah dan kan va ngah tak em! Kan nun pumpui kaihhnawih angin kan sawi ngam mang tawh lo emaw tih tur a nih hi maw. A thenin ‘Rinna chu Isua nun, Isuaa awm’ te an lo ti a, a thenin ‘Keimahni rinna ni lovin Pathianin Isua kan aia a rinna,’ te an lo ti thul. Chutiang em em lo pawhin Isua chanchin lo awih vena satliah mai mai- Chhura thawnthu kan awih leh awih loh level mai maiah te sawi phet kan tum thin. Duh dan dana nung chung si hian ‘ringtu’ nih kan khel fo a, Census Religion column-a ‘Christianity’ tih kan dah chuan kan ngaih a tha mai a ni awm e. Wurmbrand-a hmuh dan khi a dik a nih chuan kan thihchilh ngam leh ngam loh hi kan rin leh rin loh tehna tur chu a ni mai a. Pui tak a ni. Kan tla rawng rawng mai ang em? Entirnan, misualin ka inchhungah ka nupui fanaute hi tihhlum tumin rawn bei ta se, Pa ber chuan ka tan an hlutna hriain thihchilh ka ngam ngei ang. Ka hlut tak tak chu a chiang mai a ni.

A sawi harsa mah mah lo maw
Pathian Thu hi awlsam deuha pawmzam mai chi leh a harsa zawnga la chi kan awm a ni awm e. |henkhat chuan Pathian khawngaihna hmachhuanin engkim mai pawmzam thei zawng hian Pathian Thu kan thluk thin. Pawmzam thei deuh hi kan ngai thlarau duh phian bawk a. Richard Wurmbranda te ang hi chu an nih hmel loh ngawt mai. Krista vanga an tuarna nasa filma a lem an chan mai mai pawh hi ka fate chuan en harsa an ti a, scene thenkhat phei chu en ngam lovin pindanah an tlan lut zuai zuai mai a ni. Richard Wurmbrand te tan kha chuan rin leh rin loh chu thih leh dam a ni ringawt. Lunginah kum 14 a tang a, nghaisak leh tihhrehawm a tuar ni tin thin. A mit hmuh ngeia ringtu thih thlenga sawisak tuar an tam hle mai. Chutiang karah chuan rinna tak tak leh tak tak lo chu a va lang fiah duh dawn em! Rangkachak tihthianghlimna meipui an tih ang hi a ni ngei ang le.

Ring tak tak te chu
Heng mite lakah hi chuan Isua kan rinna avanga taksa leh thlarauva malsawmna dawng nasa rama cheng, kei ang te hi chu kan te chem chem mai thin a nih hi. Italy thusawi thiam Girolamo Sovonarola thusawi a rawn sawi chhawn pawh hi mutmawh hnarmawha neih chi hial a ni: ‘There are two kinds of Christians – those who sincerely believe in God and those who just as sincerely believe that they believe,” (Kristian intite zingah mi chi hnih an awm – Pathian ring tak taktute leh an ring a ni tih ring ve ringawt te). Hei hi kan thlarau nun thliartu fiahfai ber a ni hial awm asin. Tan in hrehawm leh tuarna ruamah chuan hetiangte hi a chiang viau a ni awm e. Tuarna a hmachhawn laia Richard Wurmbrand-a inzawhna chu, “Pathian ka ring tak tak em?” tih hi a ni. Heng hun laia Romania ringtuten a ruka an rawn thawn chhuah lehkhaah chuan, “Kristian hmasawn naran kan nih theih nan kan tawngtai lo va: Pathianin ni tura a tih ang tak Kristian: Krista ang Kristian, Pathian ropuina tura lungawi taka Kraws pu thin Kristian kan nih theihnan kan tawngtai zawk thin,” tiin.

Pathian hi a rintlak em?
A film chhunga mi rilru hneh deuh pakhat chu Wurmbrand-a tang rei tawh lutuk, TB vanga zawi ngawih ngawih, na bawk si tan in chhungah a ruka Kristian (anmahni tanpui tura chutianga awm tura ringtuten an ngen zawk) Dr Luigi’n ‘thihna pindan’ an tih mai Room No.4-ah a rawn hmu thut mai a. “Thi tawh angin i thang asin, Wurmbrand?” a han ti chu, Wurmbrand chuan “Naktukah a ni mahna,” tiin a chhang tawk tawk a. “Ni khat chauh pawh belh la Sabina chu a lawm ngawt ang le,” a han tih chuan khuh bawrh bawrh vanga harsa ti chung chungin, “Ka dam a ni tih te, ka hmangaih a ni tih leh, ‘Hetah hian Pathian a awm ngei a ni,’ tihte hi rawn hrilh ta che,” tiin a chhang tawk tawk a. Dr Luigi chuan “I khua a sik nasa a nih hi mawle,” a han ti a “Ka thlarau chu hlimin a zai a, ka taksa erawh chuan a zawm lem lo a nih hi,” tiin a chhang leh a. Doctor chuan, “TB chu a namai lo a nia, i thi mai ang,” a ti a. “Hmanah daih tawh khan kar hnih chauh damna hun nei tawh angin min sawi a, khata tang khan ni eng zah nge liam tawh pawh ka chhiar seng tawh hleinem,” a ti. Chutih lai tak chuan Romanian guard a lo lut a, doctor chuanin damdawi a mamawh thu leh chuti lo chuan a thih mai theih thu a lo hrilh nghal a. Sipai chuan enga ngai lo tak hian, “Thi dawn a? A thi ang chu…an thi vek alawm…Room No 4 a nih hi,” a ti sam et. Richard Wurmbrand hi kum 92 mi niin 2001 khan a thi a ni. Hetah ringawt pawh hian nunna hi Pathian kuta awm a nihzia a chiang ngei mai.

Taksaah thlarau an hmu
A chanchin hi cartoon ang te pawhin an siam a. Ka hmuh min hneh em emtu chu a fapain Jail-a chaw a va pek tum kha a ni. “Ka nu-in min ngaihtuah miah suh se, eng pawh thleng se vanah kan inhmu ang a ti,” tiin a fapa chuan a pa hnenah a hrilh a ni. A nupui Sabina hi thlarau mi tak a ni hrim hrim a. Jail a tan hmaa Communist hovin Kristian pawl hrang hrang intawhkhawma sorkar do zawnga thu sawi tura nawrtu kha a ni a. Wurmbrand-an “Hetiang ka sawi chuan pasal i nei lo mai ang,” a tih pawh khan, “Pasal dawihzep ka duh hleinem,” ti ngattu kha a nia. Pathian nihna an va han hre chiang tak em! Ani bawk hian a sawi a: “Thil lawmawm tak chu Room No. 4 atang hian tumah Pathian tawk lovin an thi lo. He room, thihna room-ah hian Pathian awm ring lote pawh an rawn lut thin…mahse thihna lui dai dawn meuh chuan tumah hi an tang zo lo,” a ti. He room-a tangte zingah hian thil ropui tam tak a thleng a ni awm e. An ei tur tlemte dawn atang chuan sawma pakhat pe khawmin an zinga chak lo ber an pe thin a, anmahni phuarna thir khaidiatte chuan musical instrument-a chantirin Pathian fakna sa chungin an khawng ri thin a ni. Van lam khian mawi a va ti dawn em! Pathian hi chu a mak mang e, hetiang dinhmunah pawh heti hian a thawk thei zel chu a nia! Awm lo ni se, engin nge mawlh tlat ni ta ang? Wurmbrand-a chuan, “Tan in hrehawm tawpkhawka ringtute nunah chuan thlarau leh taksa hi a thenhran theih tawh lo a, taksaah hian thlarau kan hmu a ni,” zu tia. Harsatna hian hmuh a tihar lo a, a tifiah telh telh zawk a ni awm e.

Lo en ve ngei teh
He film hi Youtube-ah a duh apiang en theihin a awm tawh a. Innghaisak hmuh hrehawm deuh lai awm mah se, chhungkuaa en ngei chi a ni e. Korean serial mai mai pawh kan buaipui peih chuan Mizo tawnga lehlin ni se a va duhawm ngawt mai. Amaherawhchu, hmuhnawm thlira thlir chi chu a ni hauh lo thung a. A hmuhnawm vak lo reng a. Mahse, miten Pathian an hmuh fiahzia te, an inpekna thukzia te, Pathian tana an tuar nasatzia te hre duh tan chuan en ngei ngei chi a ni e. Chu mai piah lamah, rinna tak tak awmzia leh a suak mai maia intihlungawi leh intihhlim a that lohzia a chiang khawp mai bawk a. Heng zawng zawngah hi Pathian ropuinain a luan chhuak vek bawk kan ti thei bawk ang chu. Isua Krista ringtu nih awmzia a chiang a ni. Han en ve phawt mai teh.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy