Premier League club Tottenham Hotspurs leh West Ham United te chuan thawhleh tlai khan Optus Stadium, Perth, Australia-ah friendly match an khel a, 3-2 in West Ham an chak. West Ham an hneh loh tum hian Spurs chhuahsan tura ngaih Harry Kane chuan bul a tan a, a khel chhe lo viau nghe nghe.
Tottenham manager thar Ange Postecoglou chuan tlarhmaah Manor Solomon, Dejan Kulusevski leh Harry Kane te a inkawp tir a. Son Hueng-min leh Richarlison ten hmun an chang lo. Muallaiah an player thar James Maddison, Yves Bissouma leh Oliver Skipp te a inkawp tir a. Tlahnungah Pedro Porro, Cristian Romero, Japhet Tanganga leh Sergio Reguillon ten bul an tan a, an si nghak thar Guglielmo Vicario chuan bul a tan bawk.
Europa League khel tur West Ham hian tha zetin bul an tan a, goal pawh an thun hma hle. Inkhel tan atanga minute 18-naah Danny Ings chuan hmahruaina goal a thun nghal. Ings goal thun hnu lawk hian minute 23-naah Divin Mubama chuan an goal hnihna a thun belh zui leh zat a, si hnih faia hmahruai chungin chawlhlawk an hmang.
Chawlhlawk hnu lamah Tottenham an khel tha hret a, goal thun hmasa zawkah an tang ve ta nge nge. Minute 68-naah bench atanga lut Giovani Lo Celso chuan goal thunin an si phurh a sut then a. An goal khatna an thun atanga minute thum hnu lekah bench atanga lut ve bawk Destiny Udogie chuan goal thun zui lehin an si phurh a sut zo ta nge nge.
2-2-a an inhnehtawk hnuin inkhel a hmuhnawm zual sauh a, friendly match mai ni mah se hnehna chan ngei tumin team hnihten tan an khawh. Goal thun tuma an indawr dun hnuin West Ham chu che fuh hmasa zawkah an tang nawn leh a, minute 78-naah Gianluca Scamacca chuan hma an hruai nawn lehna goal a thun. Tottenham hian an si phurh sut tumin tan an khawh zui chiam a, an hlawhtling zo ta lo thung. Inkhel hmuhnawm takah West Ham chuan London-a an elpui lian Spurs chu 3-2 in an hneh zui ta a ni.
Tottenham chhuahsan tura ngaih Harry Kane chuan Spurs tan hian bul a tan a, captain ban hren hrengin a khel chhe lo viau. Kane hi German champion Bayern Munich in lak an la tum reng a, tum hnih hlawhchham tawh mah se an la beidawng lo. Bayern hian lak tumin an dawr nawn leh ngei dawn a, hlawhtlin ngei an inbeisei tawh viau. Bayern in lak an tum Kane hi Ligue 1 champion Paris St-Germain in lak an tum thar ve leh a. England leh Spurs tana goal thun hmem ber Kane hi chuan PSG aiin Bayern Munich zawm a duh zawk ve thung.
Tottenham an chak lo
