Tottenham beiseina thar
Pathianni zana London derby-ah Tottenham Hotspurs chuan an mikhual Chelsea chu si hnih faiin an hneh a, top 4 huang luah phak beiseina thar an nei.
Tottenham leh Chelsea te hi an inhnehtawk viau a, chawlhlawk hmain goal thun thei an awm lo. Chawlhlawk hnu lamah mualneitu Spurs an khel tha leh zual a, goal hnih ngawt an thun ta hial. Second half tan atanga minute khat hnu lekah Oliver Skipp chuan pui zeta pet goal in, hmahruaina goal a thun. Skipp goal thun hnu hian goal a han vang vang a, hun tawp dawn hnaih minute 82-naah Tottenham tana goal thun hnem ber Harry Kane chuan he inkhela goal hnihna a thun a. An elpui lian Chelsea lakah Tottenham hian si hnih faiin hnehna an chang zui ta a ni.
Team lian Chelsea lakah hnehna an chan leh tak vangin Tottenham hian top 4 huang luah a, season tharah champions league khelh phak beiseina sang zawk an nei thar. Spurs hian khelh 25 atanga point 45 hmuin palinaah an insawh nghet a. An hnuai chiaha awm Newcastle United nen an inkarah point li tla zep mek mahse, Magpies ai hian vawi hnihin an khel tam zawk. Spurs in point thum an hmuh laiin Chelsea an buai zui zel thung. Blues hi EPL an khelh hnuhnung vawi 15-ah vawi hnih chauh an chak a. Khelh 24 atanga point 31 hmuin 10-naah an awm mek.
Tottenham beiseina thar
