Tottenham in City an chelh

February 2, Pathianni zan khan English Premier League khelh chhunzawm a ni a, Tottenham Hotspurs chuan an hmelma lian Arsenal tan hna tha an thawhsak a. An elpui lian Manchester City chak tur an chelh. City an chak zawh loh laiin Aston Villa an tlawm ve bawk a. Arsenal in table-ah point rukin hma an hruai fal theih phah.
Spurs 2-2 City
EPL season kal meka chetha tluang hleithei meuh lo Tottenham hian an mualah team lian Manchester City an mikhual. An mualah bul tan chhe viau mah se chawlhlawk hnu lama an chet that an chhawr tangkai a, an mualah tlawm pumpelh hramin point khat hlu tak an hmu. City chak tur an chelh vangin Tottenham hian an hmelma lian ber Arsenal tan hna tha an thawhsak a, Gunners lawm an siam thung.
Tottenham muala lenglut Manchester City hian bul an tan tha viau a, inkhel tan atanga minute 11-na lekah Rayan Cherki chuan hmahruaina goal a thun nghal. Cherki goal thun hi chhe lem lo mah se Spurs si nghak Guglielmo Vicario chet fuh tawk loh vanga a puh theih a, a chhuah ho ve deuh niin a lang.
Hma takah goal an thun vangin City an inringtawk zui viau a, goal thun belh tumin an khingpuite an naw zui nasa hle. Tottenham in an si phurh sut tumin nawr thin mah se an tlarhnung a pherh tlat thung a, goal an chhuah belh teuh thei hle. Goal chhuah belh em lovin him hram hram thin mah se an him reng thei lova, chawlhlawk dawn hnaiah goal an chhuah belh a nge nge. City in fuh taka an nawr tlang hnuin thlasik bazara an lei fuh tak Antoine Semenyo chuan minute 44-naah awlsam takin a pet goal a, an goal hnihna a thun.
Chawlhlawk hmain khel tha lo viau mah se Thomas Frank enkawl Tottenham hi chawlhlawk hnu lamah team thar hlak ang maiin an inlan a, an khel tha ta hle. Na taka aan nawr hnuin Dominic Solanke chuan minute 53-naah vanneihthlak ang reng takin goal a thun a, an si phurh a sut then. Solanke hian City lakah goal a la thun ngai miah lova, a goal thun hmasak ber hi Marc Guehi own-goal angin chhiar a ni zui leh zel bawk. Chik zawka ennawn a nih hnuin Guehi own-goal ni lovin, Solanke goal thunah pawm a ni leh ta zawk a, tui let hnu lamah a vawi khat nan City lakah goal a thun ta nge nge.
An si phurh an sut hnuin Tottenham an khel tha zui viau a, an mikhual City an nawr na thei hle. Goal thun theihna hun tha nei thin bawk mah se si nghak chetha tak chetha tak Donarumma an paltlang hleithei lo. Hun tha hlah thin bawk mah se, goal thun an tum em a, dan reng theih an ni lo. An goal khatna thuntu Dominic Solanke chuan minute 70-naah Conor C. Gallagher cross chu pui zetin a kheng goal a, an si phurh a sut zo. City laka Tottenhm si phurh sut zawhna goal Solanke thun hi EPL-ah goal ropui zingah chhiar tel a nih ngei a rinawm hle. Goal ropui a nih bakah City laka chhanhimtu goal a ni bawk kha a hlutna tizualtu a ni ngei ang.
Solanke-a’n goal ropui thun hnuin goal dang a luh belh thei tawh lova, Tottenham leh Manchester City te chu 2-2 in an inhnehtawk. Tottenham lakah uiawm taka an chak zawh loh vangin City in an tum angin Arsenal an hnaih thei lova, an inkar a zau leh zual hret. Inrinni zanah 4-0 Leeds United sawptu Aresenal chuan table chung ber an luah nghet leh zual a, pahnihna City nen an inkarah point 6 a tla zep thar leh. Pahnihnaah City an zawm zui zel laiin Tottenham in hma an sawn hret chungin 14-na an luah.
Aston Villa an tlawm
Arsenal nen an inkar tizim nawn leh tura chak mamawh Aston Villa chu an khelmualah ngei an chesual a, tam zawk ni reng chungin an mikhual Brentford lakah an tlawm. An mualah ngei an tlawm vangin Villa in Arsenal chu point 7 in an thlau ta chiah a, an tan champion a harsa leh zual sauh dawn.
Aston Villa hian Villa Park-a an mikhual Brentford hneh ngei tumin tan an khawh a, an mualah an khel chhe lem lo viau. Chawlhlawk dawn hnaih minute 42-naah Brentford player Kevin Schade hnawhchhuah a ni. An mualah tam zawk an nih vangin Villa an phur a, chak turin an dinhmun a tha hman hle.
Tlem zawk ni bawk mah se minute 45+1-ah Dango Ouattara chuan Brenrford tan hmahruaina goal a thun nawlh a, Villa a barakhaih. He goal hi sut tumin thapui chhuah thin mah se hun tawp thlengin Aston Villa in goal an thunthei lova, an mualah uiawm takin an tlawm a. Arsenal nen an inkar a zau leh zual phah a ni.