Daily Newspaper

Tourism industry chawisan a ngai

28

Hmarchhak state pariata tourism dawmkanna tur, Ministry of DoNER leh North Eastern Council tangkawp buatsaih “Destination North East 2020” hnuaia internet kaltlanga ‘virtual festival’ kalpui mek chu nimin khan Mizoram puala neih a ni a. He huna khuallian, Mizoram chief minister chuan Mizoram chu eco-tourism lama thang mek a nih thu leh, khualzin tam zawkin Mizoram an tlawh theih nana hmalak dan tur “Mizoram Responsible Tourism Policy 2020” siam a nih thu a sawi chhuak a.

Mizoram pumpui deuhthaw mai hi ram hringin a khuh a nih avangin, sik leh sa boruak a la nuam a, boruak a thianghlim a, tlang hring leh hmun nuam leh mawi tak tak hmuh tur awmna a ni a. Hetiang sik leh sa boruak nuam, mihring siam leh dinchawp thil ni lo, khuarel mawina hmuhtur la awmna hi tunlaiah chuan khualzinmite tlawh chak a ni tawh a. Hei hi kan ram rawn tlawhtu khualzinte leh, khualzin anga lokal ni lem lo, hna pawipang thawk tura Mizoram rawn tlawhtute reng reng hian, hahipin Mizoram mawina leh nawmna hi an sawi ngei ngei thin a. Sawrkar laipui hotu lian lo zinte pawhin an sawi fo chu, ‘tourism lamah potential in nei tha’ tih a ni deuh zel bawk.

Mizoram rorelna Inpui ber Assembly House-ah pawh tourism industry chu Mizoramin sum lakluhna tha tak kan neih mek a nihzia vawi duai lo sawi chhuah a lo ni tawh thin a; mahse, tun thleng hian chu ‘potential’ chu a taka chantir kawngah eng ruai kan la ang tak tak thei lo. Keini aia tourism potential nei tha bik lem lova kan hriat kan thenawm state tam zawk hi chuan eco-tourism hmangin sum an hailut chak em em tawh a ni.

Tunhma pawhin Tourism Policy hisiam a lo ni tawh thin a, mahse kan rula raw neih liam mai a, chu chu kan tun dinhmun mek hian a hrilhfiah tawk viau awm e. Tunah policy thar duan a han ni leh ta a; enge kan an zel dawn tih chu kan thlir ber a ni leh mek a.

State dangte angin hna tau tehna tur factory leh industry liantham Mizoramin kan nei zo lo va, kan neihchhunte lah cottage industry emaw, small scale industry beitham te te, employment thahnem tak pawchhuak pha lo an ni tlangpui a. Infrastructure hautak pui pui ngai miah lo, khuarel duansa, a thlawna kan dawn, he tourism industry kan neihchhun tal hi chu, state sumhnar lian takah kan chantir thei tih a chiang. Chu tal chu thatpui ve tura beihpui thlak hi kan mamawh a ni.

Chengkek rah hmin tuarh bula Chhura ding ang deuh kan nihna lai hi a la awm a; Nahaia lo kal hmaa kan harhchhuah hi a hun takzet tawh niin a lang.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy